SALMOS 83 - Dios Rimashcata Quillcashcami

Piñaccunata tucuchichun Diosta mañashcamanta

Cantangapac Asaf ruhuashca Salmomi.

¹ Sumac Dioslla, ama chunlla saquirichu. Dioslla, ama upalla imatapish mana ruhuashpa saquirichu.

² Riqui, canta piñaccunaca león shinami caparicuna. Canta mana ricunayachiccunaca sinchiyashcacunami.

³ Can acllashcacunata llaquichingapacmi pacalla yuyarinacuncuna. Cambac maquipi causaccunata tucuchingapacmi huashalla parlanacuncuna.

⁴ Paicunaca: «Paicunapac llactapish, Israel shutipish ama ashtahuan tiyachun shamuichic tucuchingapac» nincunami.

⁵ Shuc shinalla tucushpami, tucui mashna tandanacushpa, canta llaquichingapac ari nishcacuna.

⁶ Carpa huasicunapi causac edomitacunapish, ismaelitacunapish, moabitacunapish, agarenocunapish,

⁷ shinallatac Gebalpi causaccunapish, amonitacunapish, amalecitacunapish, filisteocunapish, Tiro llactapi causaccunapish shuc shinallami tandanacushca.

⁸ Asiria llactapi causaccunapish paicunahuanmi tandanacushca. Tucui paicunami Lotpac huahuacunataca rigra shina ayudashcacuna.

⁹ Paicunataca madianitacunata shina, mandac Sisarata shina ruhuaiyari. Shinallatac Cisón yacu huaicupi Jabinta shina ruhuaiyari.

¹⁰ Paicunaca Endor pueblopi huañushpami, allpapi shitana huanu shina tucurcacuna.

¹¹ Paicunapac soldadocunata mandaccunataca Oreb, Zeeb runacunata shina huañuchiyari. Zebata shina, Zalmunata shina paicunapac mandaccunataca chingachiyari.

¹² Paicunaca: «Dios causacuc pambacunataca quichushpa japishunchic» nishcami carca.

¹³ Dioslla, paicunataca acapana huaira sacha pangata ruhuac shina ruhuaiyari. Tamota huaira apac shina cachaiyari.

¹⁴ Paicunataca sachata rupachic shina, urcucunata nina muyushpa rupachic shina tucuchiyari.

¹⁵ Cambac tamya huairahuan catishpa llaquichiyari. Cambac jatun acapana huairahuan manchachiyari.

¹⁶ Mandac Dioslla, paicuna canta mashcachun pingaichishpa ñahuita pucayachiyari.

¹⁷ Paicunaca huiñaita pingaichishca cachun. Chashna pingaichishca tucurichun.

¹⁸ Cambac shutica Mandac Dios cashcata yachachun. Jahua pachapi causac Diosca tucui cai pachata mandac cashcata ricsichuncuna.