SALMOS 82 - Dios Rimashcata Quillcashcami

Mana alli juezcunata Dios rimashcamanta

Asaf ruhuashca Salmomi.

¹ Diosca jahua pacha tandanacushcapac chaupipimi mandacun. Dioscunapac chaupipi tiyarishpami allita ricushpa taripacun.

² ¿Ima horascamantac mana cashcata ruhuashpa, ñucata mana manchaccunamanrac allita ruhuashpa causagringui?

³ Imata mana ruhuai pudiccunatapish, taita mama illaccunatapish misaiyari. Llaquilla causaccunaman, huacchacunaman cashcata ruhuaiyari.

⁴ Mana misari pudiccunatapish, huacchacunatapish quishpichiyari. Diosta mana manchaccunapac maquimanta cacharichiyari.

⁵ Paicunaca imatapish mana yachanchu, imatapish mana entendinchu. Amsa purapimi purincuna. ¡Allpapish tucuimi cuyuricun!

⁶ Ñucaca: «Cancunaca dioscunami canguichic. Tucui cancunami jahua pachapi causac Diospac churicuna canguichic.

⁷ Shina cashpapish huañuclla runacuna shinallatacmi huañunguichic. Maijan mandaccuna huañuc shinallatacmi huañunguichic» nircani.

⁸ ¡Dioslla, cai pachataca jatarishpa taripaiyari! ¡Canmi tucui llactacunata cambac cachun japingui!