SALMOS 81 - Dios Rimashcata Quillcashcami

Israelcuna millaimanta anchuricpi, Dios quishpichisha nishcamanta

Cantaccunata pushac Gitit tonopi cantachichun, Asaf ruhuashca Salmomi.

¹ ¡Ñucanchic jarcarina jatun torre shina Diostaca cushicushpa cantaichicyari! ¡Jacobopac Diostaca yallita cushicushpa caparishpa alli nichicyari!

² Himnocunata tocashpa panderocunapi huactaichic. Sumacta huacac arpapipish, salteriopipish tocaichic.

³ Llullu quilla punzhacunapipish, entero quilla punzhacunapipish cornetapi tocaichic. Chai punzhacunaca yallita cushicuna punzhacunami.

⁴ Cai quillcashpa mandashcacunaca israelcuna pactachinami. Jacobopac Dios mandashcacunami.

⁵ Cai ima shina causanata yachachinataca Josepac huahuacuna Egiptomanta llucshimucpimi, paicunahuan callarirca. Ñuca mana yachashca rimaipi uyarishpaca:

⁶ «Paicunapac hombros jahuamanta llashac quipita anchuchircanimi. Maquipi aisashca llashaccunatapish cacharichircanimi.

⁷ Llaquipi cashpa ñucata caparicpica quishpichircanimi. Tulun nicuc chaupimantami cutichircani. Meriba yacu ladopimi cancuna ima shina cashcata yacharcani.

⁸ Ñuca acllashca israelcunalla, ñuca cunashcata uyaichicyari. ¡Ñuca cunashcata uyashpachari alli canguichicman!

⁹ Cancunapac chaupipi shuctac diosta ama charinguichicchu. Shuctac llacta diosta ama adoranguichicchu.

¹⁰ Ñucami cancunata Mandac Diosca cani. Ñucami cancunataca Egiptomanta llucchimurcani. Cancunapac shimita pascashpa, ñucata mañanguichiclla, ñucaca carashallami.

¹¹ Ashtahuanpish ñuca acllashcacunaca ñuca rimashcataca mana uyarcacunachu. Ñucataca mana chasquircacunachu.

¹² Chaimantami paicunapac shungu munashcata ruhuachun saquircani. Paicunapac yuyarishca shinata ruhuashpami causarcacuna.

¹³ ¡Ñuca acllashcacuna ñuca rimashcata uyashca cacpi, israelcuna ñuca mandashca shina purishca cacpica,

¹⁴ paicunata piñaccunataca utcashpami llaquichiman carcani! Paicunata mana ricunayachiccunataca ñuca maquihuanmi tucuchiman carcani» nishca uyarirca.

¹⁵ Mandac Diosta mana ricunayachiccunaca paita cazushpami causanman carca. Paicunapac causaica huiñaitami alli canman carca.

¹⁶ Diosca ashtahuan alli trigotapish, rumipi tiyac bunga mishquitapish mana nictami caranman carca.