SALMOS 80 - Dios Rimashcata Quillcashcami

Cutin allichichun Diosta mañashcamanta

Cantaccunata pushac lirio sisa tonopi cantachichun, Diosman huillashpa Asaf ruhuashca Salmomi.

¹ ¡Israelcunata michiclla uyaiyari! ¡Canca Josepac huahuacunataca ovejacunata shinami michingui! ¡Querubincunapac chaupipi causac Dioslla, achicyachiyari!

² Can tucuita ruhuac cashcahuan Efrainpac, Benjaminpac, Manasespac aillucunapac ñaupapi ñucanchicta quishpichingapac shamuiyari.

³ Sumac Dioslla, utcapi ñucanchic ima shina causacushca shinallatac causachun cutichimuiyari. Cambac sumac ñahuihuan ricucpica, quishpirishunmi.

⁴ Tucuita Mandac Dioslla, ¿ima horascamantac can acllashcacuna mañashcataca piñarishpa mana uyagringuiyari?

⁵ Huiquitami micunata shina carashcangui. Huiquitami yacuta shina yallita ubiachishcangui.

⁶ Ñucanchictaca ñucanchic vecinocuna mana cazushpa asichunmi saquishcangui. Ñucanchicta piñaccunaca paicunapurami ñucanchicta burlashpa asincuna.

⁷ Sumac Dioslla, utcapi ñucanchic ima shina causacushca shinallatac causachun cutichimuiyari. Cambac sumac ñahuihuan ricucpica, quishpirishunmi.

⁸ Chai llactapi causac runacunata llucchishpa cachashpami, Egiptomanta uvas yuracunata apamushpa tarpurcangui.

⁹ Chai yuracunata tarpungapacmi allpata picharcangui. Chaipimi chai yuracunaca sapiyashpa llacta junda tucurca.

¹⁰ Chai yuracunapac llanduca urcucunatapish taparcami. Diospac cedro yuracunatapish chai ramacunami taparca.

¹¹ Chai ramacunaca mama cuchacamanmi huiñarca. Cutin retoñocunaca Eufrates yacucamanmi chayarca.

¹² ¿Ima nishpatac chai uvas chagra muyundi pircataca tuñinguiyari? ¡Tucui ñanta pasaccunami uvasta pallashpa rincuna!

¹³ Sacha cuchicunapish, sacha animalcunapish tucuimi micucun.

¹⁴ Tucuita Mandac Dioslla, cunanllatac cutimuiyari. Cai uvas chagra ima shina cashcataca jahua pachamanta ricushpa llaquiyari.

¹⁵ Cambac alli maquihuan tarpushca yurata ricuiyari. Cambaclla cachun tarpushca retoñotapish llaquiyari.

¹⁶ Cunanca tucui rupashpa, shitashca pambamari saquirishca.

¹⁷ Cambac maquitaca cambac alli ladopi cac runapac jahuapi churaiyari. Cambaclla cachun sinchiyachishca huañuclla runapac jahuapi churaiyari.

¹⁸ Chashna ruhuacpica, canmanta mana anchurishpa, can cushca causaihuanmi cambac shutita alabashun.

¹⁹ Sumac Dioslla, utcapi ñucanchic ima shina causacushca shinallatac causachun cutichimuiyari. Cambac sumac ñahuihuan ricucpica quishpirishunmi.