SALMOS 79 - Dios Rimashcata Quillcashcami

Jerusalén pueblo urmashcamanta

Asaf ruhuashca Salmomi.

¹ Sumac Dioslla, shuctac llacta runacunami cambac llactata quichungapac shamushca. Cambaclla huasitapish mapayachishpami Jerusalén pueblotapish urmachishpa rumi montonta ruhuashpa saquishca.

² Canta servic runacunataca huañuchishpami jahuata volac animalcuna, sacha animalcuna micuchun saquishca.

³ Paicunapac yahuartaca Jerusalén pueblo muyundipimi yacuta shina jicharca. Pipish paicunata enterrangapacca mana tiyarcachu.

⁴ Ñucanchic vecinocunapac camishcami canchic. Ñucanchic muyundi llactapi causaccunapac burlashpa asishcami canchic.

⁵ Mandac Dioslla, ¿ima horascamantac piñashca cangui? ¿Huiñaitachu ñucanchic-huanca piñashca cagringui? ¿Can piñarishcaca mana huañuc nina shinachu?

⁶ Can yallita piñarishcataca canta mana ricsiccunapac jahuapi cambac shutita mana mañac mandaccunapac jahuapi churaiyari.

⁷ Jacobopac huahuacunataca paicunami huañuchishpa tucuchirca. Paicunapac llactacunatapish llaquinayaitami saquirca.

⁸ Ama ñucanchic ñaupa taitacunapac juchacunata yuyarishpa ñucanchicta llaquichichuyari. Ñucanchicca llaquihuanmi canchic, chaimanta llaquishpa utca tupangapac shamuiyari.

⁹ Ñucanchicta quishpichic Dioslla, cambac sumaimana shutimanta ayudaiyari. Cambac shutita cuyashcamanta ñucanchic juchacunata perdonashpa quishpichiyari.

¹⁰ Ama shuctac gentecuna: «¿Maipitac cancunapac Diosca?» nichun saquichuyari. Shuctac gentecuna yachachun canta serviccunapac yahuarmantaca paicunatapish ñucanchic ñaupapi huañuchiyari.

¹¹ Prezucuna huacashcapish cambac ñaupaman chayashca cachun. Huañuchingapac prezushcacunatapish tucuita ruhuac cambac rigrahuan quishpichiyari.

¹² Mandac Dioslla, ñucanchic vecinocuna canta mana alli nishpa rimashcamantaca canchis cutincaman paicunatapish llaquichiyari.

¹³ Chashna ruhuacpica, can acllashca, can michina manada ovejacuna shina ñucanchicca huiñaitami canta alabashun. Huahua huahuacunapish cantacushunllami.