SALMOS 78 - Dios Rimashcata Quillcashcami

Dios pai acllashca israelcunaman allita ruhuashcamanta

Yachachingapac Asaf ruhuashca Salmomi.

¹ Ñuca acllashcacunalla, ñuca mandashcata uyaichic. Ñuca rimashcacunataca ringrita pascashpa uyaichic.

² Ñuca rimashpaca yuyaita japina shimicunatami nigrini. Ñaupa huatacunamanta pi mana yachashca rimaicunatami huillagrini.

³ Chaicunata ñucanchic ñaupa taitacuna parlacpimi, uyashpa allita entendircanchic.

⁴ Paicunapac huahuacunapac ñaupapica mana upalla saquirinachu canchic. Mandac Diosta alabana cashcatapish, pai sumaimanacunata ruhuashcatapish quipa huahua huahuacunaman parlanami canchic.

⁵ Diosmi Jacobopac huahuacunamanca ima shina causanata yachachishpa, israelcunamanca mandashcata curca. Chaicunataca ñaupa taitacunamanmi paicunapac huahuacunamanpish, ñucanchicmanpish yachachichun mandarca.

⁶ Chaicunataca quipa huahua huahuacunapish, paicunapac ashtahuan quipa huahua huahuacunapish yachashpa, paicunapac huahuacunaman huillachunmi mandarca.

⁷ Chashna yachashpa Diospi shunguta churachun. Dios ruhuashcacunata ama cungarishpa, pai mandashcacunata pactachichunmi mandarca.

⁸ Ama ñaupa taitacuna shina Diosta mana cazuc, sinchi shungu, Diosta mana tucui shunguhuan, tucui almahuan catic cachunmi chashnaca yachachichun mandarca.

⁹ Efrainpac huahua huahuacunaca mai alli arcocunata charishpapish macanacui punzhapica huashaimanmi callparca.

¹⁰ Dios-huan ari nishcata mana pactachircacunachu. Pai mandashcacunatapish mana cazurcacunachu.

¹¹ Ashtahuanpish pai ruhuashcacunatapish, sumaimanacunata ricushcatapish cungarircacunami.

¹² Diosca Egiptopi tiyac Zoán pambacunapimi sumaimanacunata ñaupa taitacunaman ruhuashpa ricuchirca.

¹³ Mama cucha chaupitami paicunataca pasachirca. Yacuca ishcai ladoman chaupirishpami tandarishpa saquirirca.

¹⁴ Punzhaca puyuhuan ñaupashpa, tutaca ninahuan achicyachishpami paicunataca pusharca.

¹⁵ Shitashca pambapica Rumi quingraita paquishpami yacuta llucchishpa ubiachirca.

¹⁶ Callpacuc yacuta llucchishpami tucui pambacunata caita chaita callpacucta ruhuarca.

¹⁷ Chashna ruhuacpipish paicunaca millaita ruhuashpami Diosta piñachishpa catircacuna. Shitashca pambapica jahua pachapi causac Diostami piñachircacuna.

¹⁸ Dios ima shina cacta ricungapacmi paicuna munashca micunata mañarcacuna.

¹⁹ Diosta piñachishpaca: «¿Diosca cai shitashca pambapi micunata carai pudingachu?

²⁰ Riqui, rumi quingraita paquishpami yacuta llucchishpa, pambacunapi caita chaita callpacucta ruhuarca. Chashna ruhuacpipish, ¿tandata carai pudingachu? ¿Pai acllashcacunaman aichata carai pudingachu?» nircacuna.

²¹ Shina nicta Mandac Dios uyashpami Jacobopac huahua huahuacunahuanpish, israelcunahuanpish nina japiric shina piñarirca.

²² Diosta mana crishcamanta, pai quishpichina cashcapi shunguta mana churashcamantami chashnaca piñarirca.

²³ Chashna cashpapish jahua pachamanta puyuta cacharcami. Jahua pacha pungucunatapish pascarcami.

²⁴ Chashna ruhuashca jahuapish paicuna micuchunca maná shuti micunatami tamyachirca. Chashnami jahua pachamanta micunata cararca.

²⁵ Runacunaca angelcunapac micunatami micurcacuna. Micunataca atic atictami cacharca.

²⁶ Jahua pachamanta huairata cuyuchishpami, paipac tucuita ruhuac cashcahuan ura lado huairata apamurca.

²⁷ Chashna ruhuashpami aichataca ñuto allpata shina, volac animalcunataca mama cuchapi tiyac tiyuta shina paicunapac jahuapi tamyachirca.

²⁸ Chai animalcunataca paicuna causana carpa huasi chaupipipish, muyundipipish urmachircami.

²⁹ Chai aichataca huicsa pactatacmi micurcacuna. Diosca paicuna munashcata curca.

³⁰ Chashna cashpapish paicuna micushpa caticucpi, micunapish shimipirac cacpimi,

³¹ Dios yallita piñarishpa, llaquichishpa sinchi runacunata huañuchirca. Acllashca Israel runacunatami urmachirca.

³² Tucui chaicunata ruhuacpipish, ashtahuan juchata ruhuashpami Dios sumaimanacunata ruhuashcatapish mana crircacuna.

³³ Chaimantami Diosca paicunataca shuc llanduta shina chingachirca. Paicunapac causacuc huatacunataca jatun llaquihuanmi tucuchirca.

³⁴ Shina huañuchicucpimi, Diosta mashcarcacuna. Shinami tucui munaihuan mana shaicushpa mashcarcacuna.

³⁵ Chashnami Diosca paicunapac jarcarina jatun rumi cashcata, jahua pachapi causac Diosca quishpichic cashcata yuyarircacuna.

³⁶ Shina cashpapish shimillahuan alli nic tucushpami, paicunapac calluhuanca llullarcacuna.

³⁷ Paicunapac shunguca Dios-huanca mana allichu carca. Paicuna ari nishcatapish mana pactachircachu.

³⁸ Shina cacpipish llaquishpami paicuna millaita ruhuashcatapish cungarishpa mana tucuchirca. Tauca cutinmi pai piñarishcatapish ladoman churashpa, ña mana llaquichishpa cungarirca.

³⁹ Diosca paicunataca huañuclla aichayuc cashcata, samai llucshishpa, mana cutin cutimuc shina cashcatami yuyarirca.

⁴⁰ ¡Tauca cutinmi shitashca pambapi piñachircacuna! ¡Imapish mana tiyac pambapimi llaquichircacuna!

⁴¹ Dios ima shina cashcata ricungapacmi tauca cutin mañashpa, israelcunapac jucha illac Diostaca llaquichircacuna.

⁴² Paipac maquihuan llaqui causaimanta llucchishcataca mana yuyarircachu.

⁴³ Egiptopi tiyac Tanis pambapi sumaimanacunata, jatun mancharinacunata ruhuashcataca mana yuyarircachu.

⁴⁴ Chaipica pipish ama ubiachun jatun yacucunatapish, callpacuc yacucunatapish yahuartami ruhuarca.

⁴⁵ Llaquichic chuspicunatapish, tucuita tucuchic sapocunatapish cacharcami.

⁴⁶ Paicunapac granocunataca burbojacunamanmi curca. Tucui chagracunatapish langostacunamanmi curca.

⁴⁷ Paicunapac uvas chagracunataca runduhuanmi tucuchirca. Higo chagracunatapish casahuanmi tucuchirca.

⁴⁸ Paicunapac animalcunatapish, huagracunatapish runduhuan, rayohuanmi tucuchirca.

⁴⁹ Diosca Egipto llacta runacunahuan nina japiric shina yallita piñarishpami, tucui tucuchichun achca angelcunata cacharca.

⁵⁰ Pai yallita piñarishpaca mana llaquishpami paicunataca huañuchirca. Ashtahuanpish paicunapac causaitaca ungüita cachashpami tucuchirca.

⁵¹ Egipto llactapi punta huacharishcacunataca tucuimi huañuchirca. Chashnami Campac churicunapac carpa huasillapitac huañuchirca.

⁵² Diosca pai acllashcacunataca corralmanta ovejacunata llucchic shinami Egiptomanta llucchirca. Chaimantaca shitashca pambatami manada ovejata shina pusharca.

⁵³ Imatapish mana manchachunmi alli cuidashpa pusharca. Paicunata piñaccunataca mama cuchapimi ucuyachirca.

⁵⁴ Chai quipaca pai acllashcacunataca paipaclla llactamanmi apamurca. Paipac alli maquihuan atishpa japishca urcumanmi pushamurca.

⁵⁵ Chaipi causac runacunataca israelcuna ricucucpimi, llucchishpa cacharca. Chai quipaca huascahuan medishpami allpacunata chaupishpa curca. Chai runacuna causana huasicunapica Israel aillucunatami causachun churarca.

⁵⁶ Ashtahuanpish jahua pachapi causac Diosta pai ima shina cashcata ricungapacmi piñachircacuna. Ima shina causanata pai yachachishcatapish mana cazurcacunachu.

⁵⁷ Paicunapac ñaupa taitacuna shinallatacmi mana cazurcacuna. Mana allita shitac arco shinami mana cazurcacuna.

⁵⁸ Paicunapac lomacunapi altarcunata ruhuashpa, yangalla dioscunahuanmi yallita piñachircacuna.

⁵⁹ Chaita ricushpami Diosca israelcunahuan yallita piñarishpa mana chasquisha nirca.

⁶⁰ Chaimantami Silo pueblo gentecunapac chaupipi cac paipac carpa huasitaca saquirca.

⁶¹ Paica tucuita ruhuac cashcatapish, sumaimana cashcatapish yangalla tucushpami piñaccunapac maquipi churarca.

⁶² Pai acllashcacunahuanca yallita piñarishpami espadahuan huañuchichun saquirca.

⁶³ Mosocunataca ninahuanmi tucuchirca. Chaimantami carihuan manarac chayarishca solteracunaman cazarai cantoca mana tiyarca.

⁶⁴ Paicunapac curacunatapish espadahuanmi huañuchirca. Viuda huarmicunaca mana llaquirishcata ricuchi pudircachu.

⁶⁵ Shina cacpipish, Mandac Diosca sueñuimanta riccharic shinami jatarirca. Shuc macanacuc runa mishashpa caparic shinami caparirca.

⁶⁶ Paita piñaccunataca huashaiman callpachishpami llaquichirca. Chashnami huiñaita pingaichirca.

⁶⁷ Chashnami Diosca Josepac carpa huasita saquishpa, Efrainpac huahua huahuacunatapish mana acllarca.

⁶⁸ Chaipac randica Judapac ailluta, Sión urcuta acllashpami cuyarca.

⁶⁹ Chaipimi paipaclla huasitaca jahua cielocaman jatunta shayachirca. Cai pachata huiñaita charichunmi alli sinchi allpapi shayachirca.

⁷⁰ Paita servic Davidtaca ovejacunata michishpa purictami acllarca.

⁷¹ Davidtaca cunanlla huacharishca ovejacunata michina pambamantami pai acllashca Jacobopac huahuacunata, paipaclla israelcunata michichun apamurca.

⁷² Davidca israelcunataca cuyac shunguhuanmi sumacta michirca. Alli yuyaihuan cuidashpami pusharca.