SALMOS 77 - Dios Rimashcata Quillcashcami

Dios imata ruhuashcacunata yuyarishpa alli nishcamanta

Cantaccunata pushac Jedutún cantachichun, Asaf ruhuashca Salmomi

¹ Diostaca caparishpami mañarcani. Diostami caparircani, paica uyarcami.

² Llaqui punzhapica Diostami mashcani. Tutapish maquita huichai alzashpami, mana shaicushpa mañani. Ñuca almaca mana cushicurcachu.

³ Diosta yuyarishpami yallita llaquirishpa huacani. Chashna yuyarishpa llaquiricucllapitacmi ñuca almaca huañun.

⁴ Dioslla, ñuca ñahui huichcarichunpish mana saquinguichu. Yallita llaquihuan cashpami rimarinallatapish mana pudini.

⁵ Ñaupa punzhacunata ñaupa huatacunatami tucuita yuyarini.

⁶ Tutacuna ñuca cantashcatami yuyarini. Chaita yuyarishpami ñuca shungupi tapurishpaca:

⁷ «¿Jatun Dios huiñaitachu ñucanchictaca shitanga? ¿Manachu cutinllatac ñucanchictaca ayudanga?

⁸ ¿Paica huiñaitachu ña mana llaquinga? ¿Pai ñucanchicman ruhuasha nishcataca huiñai huiñaitachu cungarishca canga?

⁹ ¿Dios ñucanchicta llaquinataca cungarishcachu canga? ¿Piñarishpachu llaquina yuyaita chingachishca canga?» nishpami yuyani.

¹⁰ Shinallatac: «Diospac alli lado maquica ñucata ña mana ayudanchu» nishpami yallita llaquihuan cani.

¹¹ Mandac Dios ruhuashcacunatapish, ñaupa huatacuna pai sumaimanacunata ruhuashcatapish yuyarishami.

¹² Tucui pai ruhuashcacunatami allita yuyarisha. Pai ruhuashcacunatami huillasha.

¹³ Dioslla, cambac ñanca ima jucha illac chuyami. Ñucanchic Dios shina jatunca, ¿pi shuctac diosta tiyangayari?

¹⁴ Canca sumaimanacunata ruhuac Diosmi cangui. Can tucuita ruhuac cashcataca tucuimanmi ricuchircangui.

¹⁵ Jacobopac, Josepac huahua huahuacunataca acllashpami cambac rigrahuan quishpichircangui.

¹⁶ Sumac Dioslla, yacucunapish canta ricurcami. Chashna ricushpami chucchurcacuna. Mama cucha ucucunapish cuyurircami.

¹⁷ Puyumanta tamya urmashpami yacu jundarca. Jahua pachapish relampa jaguin nishpami urmarca.

¹⁸ Canca acapana huairapimi tulun nishpa uyarircangui. Cai pachatapish cambac relampahuanmi achicyachircangui. Allpapish manchaihuanmi chucchurca.

¹⁹ Cambac ñanca mama cuchatami rirca. Jatun timbucuc yacu chaupitami cambac purina ñantaca ruhuarcangui. Cambac chaqui sarushcataca pi mana ricsi pudircachu.

²⁰ Moises-huan Aaronhuanmi can acllashcacunataca manada ovejacunata shina pushamurcangui.