SALMOS 76 - Dios Rimashcata Quillcashcami

Diosca mishacpish, mandacpish cashcamanta

Cantaccunata pushac pusac cuerdayuc tocanacunahuan cantachichun, Asaf ruhuashca Salmomi.

¹ Diosca Judá llactapica ricsishcami. Israel llactapica paipac shutitaca alli nincunami.

² Paihuan tupana huasica Salem pueblopimi tiyacun. Pai causana huasica Sionpimi can.

³ Chaipimi paita piñaccunapac escudotapish, espadatapish, arcotapish, ima macanacunatapish paquirca.

⁴ ¡Canca sumaimana achic nicucmi cangui! Animalcuna tiyac urcucunatapish yallimi sumaimana cangui.

⁵ Sinchi gentecunata mishashpami quichurcangui. Paicunaca huiñaitami sueñucun, mana riccharingachu. Chai macanacuc runacunaca shucllapish mana maquita alzarcachu.

⁶ Jacobopac Dioslla, can jarcashpa rimacpica, carretacunapish, caballocunapish mana cuyuri pudircacunachu.

⁷ Canca manchana Diosmi cangui. Can piñaricpica, ¿pitac cambac ñaupapi tiyacui pudingayari?

⁸ Jahua pachamantami llaquichinata huillarcangui. Shina huillacpica, tucui cai pachapi causaccunami mancharishpa upalla saquirirca.

⁹ Dioslla, taripangapac jatarishpaca, cai pachapi causac alli shungucunata quishpichingapacmi jatarircangui. Shina ruhuacpica mancharishpami upalla saquirircuna.

¹⁰ Gentecuna piñaricpica, canca alli nishcami cangui. Piñashpa llaquichishcamanta saquirishcacunataca canmi tucuchingui.

¹¹ Cancunata Mandac Diosman imata cusha nishpaca pactachinami canguichic. Cuchulla llactacunapi causaccunapish manchana Diosman ofrendata apamuichicyari.

¹² Paimi mandaccunata cumurichin. ¡Paica cai pachata jatun mandaccunapac manchana Diosmi!