SALMOS 75 - Dios Rimashcata Quillcashcami

Jatun tucushcacunata Dios llaquichinamanta

Cantaccunata pushac cantachichun Asaf ruhuashca Salmomi. Cai Salmotaca ama tucuchichun nishca tonopi cantachichunmi ruhuashca.

¹ ¡Dioslla, pagui ninchicmi! ¡Cutin cutinmi pagui ninchic! Cambac shutica ñuca cuchupimi. Tucuimi can imata ruhuashcacunataca huillancuna.

² Diosca: «Ñuca acllashca punzhapimi gentecuna imata ruhuashcata ricushpa taripasha.

³ Allpa, chaipi causaccunandi chucchucpica, ñucallatacmi pilarcunata charisha» ninmi.

⁴ Jatun tucushcacunatapish, mana cazuccunatapish rimashpaca: «¡Ña ama ashtahuan jatun tucushpa cushicuichicchu!

⁵ ¡Ama yallita cari tucushca caichicchu. Ama pingai illac shina maipish cachun rimaichicchu!» ninmi.

⁶ Jatun tucuna yuyaica inti llucshic ladomantapish, inti tigrana ladomantapish, shitashca pambamantapish mana shamunchu.

⁷ Ashtahuanpish Diosmi taripashpa, maijantaca cumurichin, maijancunataca cushichin.

⁸ Mandac Diosca pucushca jayac vinotaca paipac copa jundatami charicun. Chai vinoca tucuilayahuan chapushcami. Chai vinota pai tallicpica, tucui cai pachapi causac paita mana cazuccunami tucuringacaman ubianga.

⁹ Shina cacpipish, ñucaca Jacobopac Diosmanta huillashpami paita punzhanta cantacushalla.

¹⁰ Paimi millaita ruhuaccuna mandacucta chingachinga. Ashtahuanpish cashcata ruhuac mandactaca ashtahuanmi cushichin.