SALMOS 74 - Dios Rimashcata Quillcashcami

Piñaccuna llaquichicucpi Diosman huillashcamanta

Yachachingapac Asaf ruhuashca Salmomi.

¹ Dioslla, ¿imamantatac ñucanchictaca huiñaita cungaringuiyari? ¿Ima nishpatac cambac michina pambacunapi cac ovejacunahuanca nina japiric shina piñaringuiyari?

² Ñaupa punzhacunamanta can acllashcacuna cambac aillu cachun llaquimanta llucchishcacunata yuyariyari. Can causana Sión urcutapish yuyariyari.

³ Huiñaipac mana allichipac llaquinayaita siricucta ricungapac shamuiyari. Piñaccunami chai huasitaca urmachirca.

⁴ Canta piñaccunaca cambac tandanacuna huasi ucupimi mishashpa caparincuna. Paicuna japishcata ricuchic banderatami churarcacuna.

⁵ Quichqui yuracunata tigrachingapac hachahuan yaicuc shinami yaicurcacuna.

⁶ Chashnami hachacunahuan, martillocunahuan yaicushpa caspimanta ruhuashca sumac ricunacunata tucui paquircacuna.

⁷ Cambac huasitaca ninata churashpami rupachirca. Canta yuyarina carpa huasitapish, pambapi shitashpami sarurcacuna.

⁸ Paicunapac shungupica: «¡Tucuita tucuchishun!» nircacunami. Diosta yuyarishpa tandanacuna huasicunataca tucui llactapimi rupachircacuna.

⁹ Can ñucahuan cashcata ricuchic señaltapish mana ricunchicchu. Can ima nishcata huillaccunapish mana tiyanchu. Maicaman cai llaquicuna tiyanatapish ñucanchicpurapica pi mana yachanchicchu.

¹⁰ Dioslla, ¿maicamantac ñucanchicta llaquichiccunaca pingaichicungalla? ¿Canta piñaccunaca huiñaitachu canta camishpa causagrincuna?

¹¹ ¿Ima nishpatac cambac maquita pacanguiyari? ¿Ima nishpatac tucuita ruhuac cambac maquitaca cruzashpa shayacunguiyari?

¹² Shina cashpapish Dioslla, ñaupa punzhacunamantami ñuca jatun mandac cangui. Canmi cai pachapica jatun macanacuita atishpa quishpichic cangui.

¹³ Tucuita ruhuac cashpami mama cuchatapish chaupircangui. Yacupi tiyac manchana animalcunatapish umata ñutuchircanguimi.

¹⁴ Leviatán nishca manchana animaltapish umapi sarushpami shitashca pambapi causac animalcunaman cararcangui.

¹⁵ Canmi yacu junducunatapish, callpac yacucunatapish llucchircangui. Pi mana jarcaipac jatun yacutapish chaquichircangui.

¹⁶ Punzhapish, tutapish cambacmi. Intitapish, quillatapish canmi churarcangui.

¹⁷ Canmi cai pacha maicaman canatapish ruhuarcangui. Usyai punzhacunatapish, tamya punzhacunatapish canmi churarcangui.

¹⁸ Mandac Dioslla, canta piñaccuna canta camishcataca amatac cungaringuichu. Imatapish mana entendic gentecunami canta camincuna.

¹⁹ Cambac urpicunataca ama cai millai animalcunaman caraichu. Cambaclla causaccuna llaquipi causachunca ama cungarishpa saquinguichu.

²⁰ Ñucanchic-huan ari nishcata yuyariyari. Tucui llactapimi amsapi cashca shina llaquita ruhuancuna.

²¹ Llaquita apaccunataca ama ashtahuan sarushca cachun saquichu. Llaquita apacuc huacchacunamari cantaca alabangacuna.

²² Dioslla, mana entendic runaca punzhanta camicunllami. Chaitaca jatarishpa misaiyari.

²³ Canta piñaccuna caparicuctaca ama cungarichu. Huaicashpa canman uyarictami camincuna.