SALMOS 73 - Dios Rimashcata Quillcashcami

QUIMSANIQUI PARTE (Salmos 73—89 ) Dios millaicunata llaquichishcamanta

Asaf ruhuashca Salmomi.

¹ ¡Diosca israelcunahuanpish, chuya shungucunahuanpish allimi!

² Ñucamanta nishpaca lluchcarishpa, ña tigranallami carcani.

³ Diosta mana manchaccuna cari tucushcata ricushpa, paicuna chayuccuna cacpimi, ñuca shungupipish munarcani.

⁴ Paicunataca huañuchic ungüillapish mana japinchu. Chaipac randica yallita sinchiyancunami.

⁵ Caishuc huañuclla gentecuna shina mana ima llaquitapish, ima nanaita mana charincunachu.

⁶ Huallcata churaric shinami jatun tucushpa purincuna. Churanata churaric shinami millaita ruhuancuna.

⁷ Ñahuicuna llucshirictami huirayancuna. Shungu yuyashcatami yalli millaita ruhuancuna.

⁸ Pitapish yangalla nishpami yallita millaita rimancuna. Jatun tucushpami llaquichingapac yuyarincuna.

⁹ Jahua pachapi tiyactami camincuna. Paicunapac calluhuanca tucui cai pachapi causaccunatami imatapish rimancuna.

¹⁰ Chaimantami Dios acllashcacunaca paicunapacman rincuna. Paicuna ima yachachishcatapish uyancunallami.

¹¹ Millaicunaca: «Diosca, ¿ima shinatac yachangayari? Jahua pachapi causac Diosca, ¿ima shinatac ricungayari?» nincunami.

¹² Riquichic, Diosta mana manchaccunaca imapish mana tucushpami jahualla chayucyancuna.

¹³ ¡Yangallami chuya shungu tucushpa, ñuca maquicunapish chuya cashcani!

¹⁴ Ashtahuanpish punzhantami azotishca causani. Tucui tutamantami macashca purini.

¹⁵ Ñucapish paicuna nishcata rimashpaca can Diospac huahuacunata pandachimanmi.

¹⁶ Chaicunata entendinaca ñucamanca yallita sinchimi carca.

¹⁷ Diospaclla huasiman yaicushpami, paicuna ima tucuna cashcataca allita entendircani.

¹⁸ Paicunata llaquipi urmachingapacmi lluchcarinapi saquishcangui.

¹⁹ ¡Cungaillami llaquica japinga! Yallita mancharishpami tucuringacuna.

²⁰ Sueñuimanta riccharic shinami Jatun Dios jatarishpa paicuna ima shina cashcata yangapi churanga.

²¹ Ñuca almaca yallitami llaquirirca. Ñuca shungupish tucsicuc shinami nanarca.

²² Ñuca imatapish mana yachac, mana entendic cashpami chashna carcani. Cambac ñaupapica shuc animal shinami carcani.

²³ Shina cashpapish canmantaca manatac caruyarcanichu. Canca alli maquimantami ñucataca charirarcangui.

²⁴ Canca cunashpami ñucataca pushangui. Quipataca alli nishpami chasquingui.

²⁵ Jahua pachapica canllatami charini. Pi shucca mana tiyanchu. Cai pachapi canhuan cashpaca pi shuctatac mana munanichu.

²⁶ Ñuca cuerpopish, ñuca shungupish huañunallami. Shina cacpipish jatun rumi shina Diosmi ñuca shunguman fuerzata cun. Diosca huiñaitami imatapish allita cun.

²⁷ Riqui, canmanta caruyaccunaca chingaringami. Canmanta anchuriccunataca tucuitami tucuchingui.

²⁸ Ñucamanca Diospac cuchupi canami tucuimanta yalli alli. Can tucui ruhuashcacunata huillangapacmi can jatun Mandac Diosta shuyashpa causani.