SALMOS 72 - Dios Rimashcata Quillcashcami

Jatun mandacmanta Diosta mañashcamanta

Salomonman ruhuashca Salmomi.

¹ Dioslla, cashcata ruhuanata jatun mandacman yachachiyari. Paipac churimanpish allita mandanata yachachiyari.

² Paimi can acllashcacunata cashcata ricushpa mandanga. Huacchacunamanpish allitami ruhuanga.

³ Urcucunapish can acllashcacunamanca sumacta cushilla causaitami cunga. Lomacunaca cashcata ruhuanatami cunga.

⁴ Gentecunapurapi llaquilla causaccunataca allita ricushpami mandanga. Huacchacunapac huahuacunata quishpichishpami, llaquichiccunataca sarunga.

⁵ Intipish, quillapish tiyashcacamanmi tucui huahua huahuacuna canta manchanga.

⁶ Jatun mandacca pitishca quihuapi sumacta tamyashca shinami canga. Garua tamya allpata nuyuchic shinami tucunga.

⁷ Pai mandacuc punzhacunapi cashcata ruhuanaca sisa shinami canga. Quilla tucuringacamanmi cushilla causaica tiyanga.

⁸ Paica shuc lado mama cuchamantaca caishuc ladocaman, jatun yacumantaca cai pacha tucuricamanmi mandanga.

⁹ Paipac ñaupapica shitashca pambacunapi causaccunapish cunguringacunami. Paita piñaccunaca allpatami lambingacuna.

¹⁰ Tarsis llactata jatun mandaccunapish, yacu patapi causac caishuc jatun mandaccunapish, paiman allicunata cungapacmi apamunga. Sabá llacta, Seba llactata jatun mandaccunapish huatantami convidanacunata cungacuna.

¹¹ Tucui jatun mandaccunami paipac ñaupapi cunguringa. Tucui shuctac llactacunapi causaccunami paita servinga.

¹² Paita mañac imata mana chariccunatapish llaquimanta llucchingami. Pi ayudacta mana charic huacchacunatapish ayudangami.

¹³ Imata mana chariccunatapish, huacchacunatapish llaquishpami paicunapac causaita quishpichinga.

¹⁴ Paicunapac causaitaca llullamantapish, llaquimantapish quishpichingami. Paipac ñahuipica paicunapac yahuarca valicmi.

¹⁵ Jatun mandacca causacungallami. Sabá llactamanta curitami cungacuna. Paimantaca Diosta mañacungallami. Punzhantami paita bendicianga.

¹⁶ Pambacunapipish, jahua urcucunapipish grano tiyachun. Chai muyupish Líbano urcu yuracuna shina tucuchun. Pueblopi causaccunapish quihua sumacta sisac shina cachun.

¹⁷ Jatun mandacpac shutica huiñaitami causanga. Inti tiyashcacaman paipac shutica alli nishcami canga. Paimantami tucui shuctac llactapi causaccunaca bendiciashca canga. Paicunaca yallita cushicushpami alli ningacuna.

¹⁸ ¡Israelcunapac Mandac Dioslla, alli nishca cachun! Paillami sumaimanacunata ruhuacca.

¹⁹ ¡Paipac sumaimana shutica huiñaita alli nishca cachun! Paipac sumaimana achicca tucui cai pachapi jundashca cachun. Chashna cachun, chashna cachun.

²⁰ Isaipac churi David mañashcaca caipimi tucurin.