SALMOS 71 - Dios Rimashcata Quillcashcami

Yuyac runa llaquihuan cashpa Diosta mañashcamanta

¹ Mandac Dioslla, canllapimi miticushpa causani. Amatac pingaichishpa saquinguichu.

² Cashcata ruhuac cashcamanta ayudashpa quishpichiyari. Ñuca ladoman ringrita churashpa uyaiyari.

³ Ñuca huiñaita miticungapac rina jatun rumi caiyari. Canca ñuca miticuna jatun rumi shina, muyundita jatun pircashca shinami cangui. Canca ñucata quishpichic cangui.

⁴ Ñuca Dioslla, canta mana manchaccunapac maquimanta, millaicunapac maquimanta, llaquichiccunapac maquimanta quishpichiyari.

⁵ Mandac Dioslla, canmi ñuca shuyanapish, ñucata huambramanta pacha cuidacpish cangui.

⁶ Ñucataca mamapac huicsapi cacpiracmi cambac maquipi charircangui. Ñuca mamapac huicsamantapish canmi llucchircangui. Chaimantami canllata alabasha.

⁷ Ñucata ricushpaca tucuimi mancharirca. Shina cacpipish, canca ñuca miticuna sinchi rumi shinami cangui.

⁸ Ñuca shimica canta alabana rimaicunallahuan cachun. Punzhanta can sumaimana cashcata huillachun.

⁹ Ñuca yuyacyacpipish ama shitanguichu. Fuerza illac tucucpipish ama saquinguichu.

¹⁰ Chaica ñucata piñaccunaca rimancunami. Huañuchingapac tandanacushpa,

¹¹ parlanacushpaca: «Diosca paitaca saquishcami. Paitaca pi quishpichic mana tiyanchu. Chaimanta catishpa japichiclla» nincunami.

¹² Dioslla, ama ñucamanta caruyaichu. Ñuca Dioslla, ñucata quishpichingapac utca shamuiyari.

¹³ Ñuca causaita tucuchishun niccunaca pingaichishpa chingachishca cachun. Ñucata llaquichishun niccunaca muspachishpa, yallita pingaichishca cachun.

¹⁴ Ashtahuanpish ñucaca tucui causaipimi ashtahuan ashtahuan alabacushalla.

¹⁵ Can cashcata ruhuac cashcata, can quishpichic cashcataca tucui punzhami ñuca shimica huillacungalla. Maita mana yupaipac cacpipish huillacushallami.

¹⁶ Mandac Dioslla, pi mana ruhuaipaccunata can ruhuashcataca huillacushallami. Can ruhuashcacunataca yuyaricushallami.

¹⁷ Sumac Dioslla, huambramanta pachami ñucataca yachachircangui. Chaimantami jatun mancharinacunata can ruhuashcataca huillacunilla.

¹⁸ Dioslla, can tucuita ruhuac cashcataca quipa huiñaicunamanpish, quipa huahua huahuacunamanpish huillangacaman yuyacyashpa yurac uma cacpipish ama saquinguichu.

¹⁹ Dioslla, jahua pachaman chayactami cashcata ruhuashcangui. Canmi jatun mancharinacunata ruhuashcangui. ¡Dioslla, can shinaca pi mana tiyanchu!

²⁰ Achca llaquicunata, nanaicunatami ricuchircangui. Shina cashpapish canllatacmi cutin causaita cushpa enterrashcamantapish llucchingui.

²¹ Ñucata ashtahuan alli nishcata ruhuashpami cutinllatac cushichingui.

²² Dioslla, canllatami salteriopi tocashpa alabasha. Israelcunapac jucha illac Dioslla, can imatapish pactachic cashcataca arpapi tocashpami cantasha.

²³ Ñuca salmocunata cantacpica, ñuca shimica cushicungami. Can quishpichishcamantaca ñuca almapish cushicungami.

²⁴ Ñucata mana allita ruhuasha niccunata pingaichishpa muspachishcamantami, ñuca calluca can cashcata ruhuac cashcataca punzhanta huillacungalla.