SALMOS 7 - Dios Rimashcata Quillcashcami

Mandac Diosca cashcata ruhuac cashcamanta

Benjaminpac churi Cus camishcamanta Mandac Diosta David cantashca llaquilla Salmomi.

¹ Ñucata Mandac Dioslla, canca ñuca miticunami cangui. Ñucata llaquichingapac caticcunapac maquimanta quishpichiyari.

² Paicuna ñucata japishpaca león shinami pitinacunga. Chashna ruhuacpica pipish mana misangachu.

³ Ñucata Mandac Dioslla, ima millaita ruhuashca cacpi, ñuca maqui ima mana allita ruhuashca cacpi,

⁴ ricsishca runa ñucaman allita ruhuashca jahua ñuca paita mana allita ruhuashca cacpi, ñucata piñacta manapish faltayuc cacpi, llaquichishca cacpica,

⁵ ñucata piñacca japishpa llaquichichunlla. Pambaman shitashpa, ñuca alli nishca shutitapish saruchunlla.

⁶ ¡Ñucata Mandac Dioslla, piñarishpa jatariyari! Ñucata piñaccuna llaquichicpi ñucamanta shayariyari. Canca cashcata ruhuasha nishpami mandarcangui. ¡Chaimanta ñucata misaiyari!

⁷ Tucui llactapi causaccunami tandanacushpa cambac muyundita shayarincuna. Jahua pachamanta paicunata mandaiyari.

⁸ Mandac Diosmi gentecunataca taripanga. Mandac Dioslla, ñucataca cashcata ruhuac cashca shinallatac taripangui. Ñucaca mana faltayucchu cani.

⁹ Cashcata ruhuac Diosmi cangui. Gentecunapac shungutapish, yuyaitapish tucuitami yachangui. Millaita ruhuaccunataca chingachiyari. Ashtahuanpish cashcata ruhuactaca pi mana cuyuchipacta chariyari.

¹⁰ Diosmi escudo shina jarcacun. Shungumanta cashcata ruhuaccunataca paimi quishpichin.

¹¹ Diosca cashcata ruhuac juezmi. Mana allita ruhuaccunataca punzhantami piñacunlla.

¹² Diosca paita mana cazuccuna mana llaquiricpica, espadatami filoyachin. Arcotapish ñami allichishpa charicun.

¹³ Huañuchinacunatapish allichishpami charicun. Rupacuc flechacunatapish allita ruhuashpami charicun.

¹⁴ Diosta mana manchacta ricui. Paicunaca millaicunata huicsayuc tucushpami, llullata huacharca.

¹⁵ Jatun jutcutamari ruhuashcacuna. Chai jutcullapitacmi urmangacuna.

¹⁶ Paicuna millaita ruhuashcaca paicunallatatacmi llaquichinga. Paicuna llaquichingapac yuyarishcapish paicunapac jahuallapitacmi urmanga.

¹⁷ Cashcata ruhuac Diostaca alabashami. Jahua pachapi causac Mandac Diospac shutitaca cantacushallami.