SALMOS 69 - Dios Rimashcata Quillcashcami

Llaquihuan cashpa Diosta caparishpa mañashcamanta

Cantaccunata pushac lirio sisa nishca tonopi cantachichun, David ruhuashca Salmomi.

¹ ¡Dioslla, quishpichiyari! Yacuca ñucata aguachigrinca.

² Maipi mana shayari pudipac turupimi ucuyashcani. Ñuca chaquihuanpish sinchi allpapi mana tupanichu. Jatun yacuca ucumanmi aisacun.

³ Cunga nanangacaman caparishpami, yallita shaicushcapish cani. Ñuca Diosta shuyacucllapimi ñahuipish amsayan.

⁴ Ñucata yanga piñaccunaca ñuca acchatapish yallimi mirashca. Ñucata yanga llaquichiccunaca ashtahuanmi sinchiyashcacuna. ¡Manapish shuhuashca cashpami paimanca cutichishcani!

⁵ Dioslla, ñuca yuyai illac cashcataca canllatac yachanguimi. Ñuca juchacunapish mana pacaipacchu.

⁶ Tucuita Mandac Dioslla, canta yuyarishpa shuyaccuna ñucamanta ama pingaichishca cachun. Israelcunata Mandac Dioslla, canta mashcaccunaca ñucamanta ama llaqui tucuchun.

⁷ Canta cuyashpami rimashpa llaquichishcapish carcani. Ñucaca yallita pandarishcamantami ñahuipish pucayashca carcani.

⁸ Ñuca huauquicunapac ñaupapipish mana ricsishca shinami cani. Ñuca mamapac huahuacunapacpish maimanta shamushca shinami cani.

⁹ Canta mañana huasita yallita munashpami huañucuni. Canta rimashcacunaca ñucatami llaquichin.

¹⁰ Mana micushpa tucui shunguhuan canta mañashcamantami rimashpa pingaichincuna.

¹¹ Sharpa churanata churarishca cacpimi, ñucata burlashpa rimarcacuna.

¹² Pueblo pungupi tandanacushca runacunapish ñucata piñashpami rimarcacuna. Machashcacunapish ñucata mana alli nishpami cantarcacuna.

¹³ Shina cacpipish Mandac Dioslla, can ñucata llaquina punzhapimi mañacuni. Dioslla, can yallita llaquic cashcamanta, ñuca mañashcata cutichiyari. Can cashcata nic cashcamanta quishpichiyari.

¹⁴ Cai turumanta ñucata llucchiyari. Ama ucuyachun saquichu. Ñucata mana ricunayachiccunapac maquimanta quishpichiyari. Jatun yacu ucumanta llucchiyari.

¹⁵ Ama yacupi chingarichun saquichu. Jatun yacu ñucata apanamanta chariyari. Yallita pura jutcupi ama taparichun saquichu.

¹⁶ Mandac Dioslla, can yallita cuyac cashcamanta ñuca mañashcata cutichiyari. Can yallita llaquic cashcamanta ñucata ricuiyari.

¹⁷ Cambac servicmantaca cambac ñahuita ama pacaichu. Ñucaca huañugricunimi utca ayudaiyari.

¹⁸ Ñuca ladoman shamushpa quishpichiyari. Ñucata piñaccunamanta pacaiyari.

¹⁹ Ñucata rimashpa, camishpa llaquichictaca canllatac yachanguimi. Ñucata piñaccunaca tucui mashna cambac ñaupapimi.

²⁰ Camishpami ñuca shungutaca yallita llaquichincuna. Urmashpa mana jataripacmi cani. Maijanpish ñucata llaquingapishchari yuyarcanimi. Shina cacpipish mana pi tiyarcachu. Maijanpish ñucata cushichingapishchari nishpami mashcarcani. Shina mashcashpapish mana tarircanichu.

²¹ Micunata cunapac randica jayac hieltami curcacuna. Yacunayachicpica, vinagretami ubiachirca.

²² Paicuna jatun micuita ruhuashcapish tuclla shina cachun. Allipac ruhuashcapish, paicunapac mitcarina cachun.

²³ Imata ama ricuchun paicunapac ñahui amsayashca cachun. Paicunapac huasha lomocunapish tucui causaipi chucchucuchun.

²⁴ Can piñarishcaca paicunapac jahuapi urmachun. Can nina japiric shina piñarishcaca paicunata llaquichichun.

²⁵ Paicunapac huasipish shitashca saquirichun. Paicunapac carpa huasicunapica pi ama causachun.

²⁶ Paicunaca llaquihuan cac runatami llaquichincuna. Can nanachishca runatami mana alli nishpa parlancuna.

²⁷ Paicuna mana allita ruhuashcamantaca mana allillatatac paicunaman ruhuaiyari. Paicunapac juchataca amatac perdonanguichu.

²⁸ Shuticunatapish causaccunapac quillcashca libromanta anchuchishca cachun. Shinallatac cashcata ruhuaccunahuan pactaca ama quillcashca cachun.

²⁹ Ñucaca nanaihuan llaquirishcami cani. Dioslla, can quishpichishpa ashtahuan jahuaman churaiyari.

³⁰ Ñucaca Diospac shutitaca cantashpami alli nisha. Canta pagui nishpami alabasha.

³¹ Chashna alabacpimi, Mandac Diosca maltón becita tucui cushcamanta, huagratapish cushcamanta yalli cushicunga.

³² Chaita ricushpaca llaquichishca runacunaca cushicungami. Diosta mashcaichic. Chashna mashcaccunaca shungupi causaita charinguichicmi.

³³ Mandac Diosca huacchacuna mañashcata uyanmi. Pai acllashcacuna prezu cachunpish mana saquinchu.

³⁴ Jahua pachapish, mama cuchapish, chaipi tucui tiyaccunapish paita alabaichicyari.

³⁵ Diosmi Siontaca llaquimanta llucchinga. Judá llacta pueblocunatapish cutin allichinga. Chaipi causai callarishpami chai pueblotaca paicunapac cachun japingacuna.

³⁶ Paita serviccunapac huahua huahuacunami chai pueblotaca paicunapac cachun japingacuna. Paipac shutita cuyaccunami chaipica causangacuna.