SALMOS 68 - Dios Rimashcata Quillcashcami

Israelcuna macanacuita mishashcamanta

Cantaccunata pushac cantachichun, David ruhuashca Salmomi.

¹ Dios jataricpi, paita piñaccunaca caita chaita callpachun. Paita mana ricunayachiccunapish paipac ñaupamanta rishpa maipi miticugrichun.

² Paicunataca cushnita chingachic shina chingachichun. Diosta mana manchaccunaca huira ninapi nuyuc shinami chingaringacuna.

³ Ashtahuanpish cashcata ruhuaccunaca Diospac ñaupapi yallita cushicushpami saltangacuna.

⁴ ¡Diosta cantaichic! ¡Paipac shutita salmocunahuan cantaichic! ¡Caballopi montashpa puyu jahuata puricta jatunyachichic! ¡Paipac shutica Mandac Diosmi! ¡Paipac ñaupapi cushicuichic!

⁵ Paipaclla huasipi tiyacuc Diosca taita mama illac huahuacunapac Taitami. Viudacunapac juezmi can.

⁶ Diosmi shitashca huahuacunataca, familiahuan causachun churan. Prezu causaccunatapish cacharichinmi. Paita cariyaccunataca chaquishca allpapimi causachun churan.

⁷ Dioslla, can acllashcacunataca shitashca pambatami ñaupashpa pushamurcangui.

⁸ Chashna shamucpica, allpaca chucchurcami. Jahua pachamantapish tamya urmarcami. Sinaí urcupish israelcunapac Diospac ñaupapica chucchurcami.

⁹ Dioslla, achca tamyatami cacharcangui. Chashna cachashpami cambac chaquishca allpatapish nuyuchircangui.

¹⁰ Chaipimi cambac corral ovejacunata causachun churashcangui. Dioslla, cuyac cashpami huacchacunamanca causanata cushcangui.

¹¹ Mandac Diosmi huillachun mandarca. Chaita achca huarmicuna huillashpaca:

¹² «¡Jatun mandaccunami paicunapac soldadocunandi callpacun!» nircacuna. Cutin huasipica huarmicunami macanacuipi quichushcata chaupinacurca.

¹³ Ashtahuanpish cancunaca ovejacunapac chaupipimi sueñurcanguichic. Palomapac alasta cullquihuan cahuishca shina, plumacunapish curihuan cahuishca shinami tucunguichic.

¹⁴ Tucuita ruhuac Dios chai jatun mandaccunata caita chaita callpachicpica, Salmón urcuca rasuhuan tapashcami saquirirca.

¹⁵ ¡Basán urcuca Diospac urcumi! ¡Chai urcucunaca jatun urcumi!

¹⁶ Jatun urcucunalla, ¿ima nishpatac Dios tiyana acllashca urcutaca munashpa chapanguichic? Mandac Diosmi chaipica huiñaita causanga.

¹⁷ Diospac macanacuna carretacunaca huaranga huarangami. Chaicunahuanmi Sinaí urcumantaca huasiman shamurca.

¹⁸ Mandac Dioslla, prezucunata apashpami, jahuaman rircangui. Gentecunamantapish ofrendata japircanguimi, mana cazuccunamantapish japina cashcatami japircangui. Paicunapac chaupipi mandangapacmi chashna japircangui.

¹⁹ Ñucanchicta Mandac Diosca alli nishca cachun. Paica punzhantami ashtahuan allicunata cun. Paica ñucanchicta quishpichic Diosmi.

²⁰ Ñucanchic Diosca quishpichic Diosmari. Mandac Diosmi huañuimantapish quishpichin.

²¹ Diosca paita piñaccunataca umacunatami chugrichinga. Juchata ruhuashpa causaccunataca uma coronatami chugrichinga.

²² Mandac Diosca: «Basán llactamantami cutichimusha. Mama cucha yacumantapish llucchimushami.

²³ Cancunata piñaccunapac yahuarpi chaquicunata pambachun, cancunapac allcucuna chai yahuarta lambichunmi chashnaca ruhuasha» nirca.

²⁴ ¡Sumac Dioslla, ñuca Dioslla! ¡Ñuca jatun Mandaclla, macanacuita mishashpa, cambac huasiman shamucuctami tucui ricurcacuna!

²⁵ Cantaccunaca huashata, tocaccunaca ñaupata, cutin solteracunaca panderocunapi huactashpami chaupita shamurcacuna.

²⁶ ¡Jatun tandanacuipi Diosta allimari cangui nichicyari! ¡Tandanacushca israelcuna, Mandac Diostaca allimari cangui nichicyari!

²⁷ Tucuipac quipa churi Benjaminmi paicunata mandacurca. Judá aillucunata mandaccunapish paicunapac achca gentecunahuanmi chaipi carca. Zabulón, Neftalí aillucunata mandaccunapish chaupimi carca.

²⁸ Ñuca Dioslla, ñuca Dioslla cambac fuerzata ricuchi. ¡Dioslla, ñucanchicman can imata ruhuashcataca cutin huillailla!

²⁹ Jerusalenpi tiyac cambac huasimantami jatun mandaccunaca imalla caranacunahuan shamunga.

³⁰ Macanacungapac tandanacuc gentecunata llaquichiyari. Llactapi causac becicuna shina gentecunapac chaupipi shayacuc piña huagracunata manchachiyari. Cullquiraicu llaquichiccunata llaquichiyari. Macanacushpa cushicuc gentecunata caita chaita cachaiyari.

³¹ Egipto llactata jatun mandaccunami shamungacuna. Etiopía llactapi causaccunaca paicunapac maquitami Mandac Diospac ladoman chutanga.

³² Cai pacha llactacunata mandaccuna Diosta cantaichicyari. ¡Mandac Diosta cantaichicyari!

³³ Jahua pachamanta ashtahuan jahua pachapimi caballopi montashpa utca huatamanta pacha puricun. Pai jatun poderhuan rimashcata uyaichicyari.

³⁴ ¡Dioslla jatun poderta charishcata yachaichicyari! Chai podertaca israelpurapimi ricuchicun. Jahua pachamantami paica tucuita ruhuacun.

³⁵ Diosca paipaclla huasipi tiyashpami, jatun mancharinacunata ruhuacun. Israelcunapac Diosca pai acllashcacunamanca fuerzata cushpami sinchiyachin. ¡Sumac Diosca alli nishca cachun! 4