SALMOS 67 - Dios Rimashcata QuillcashcamiDiostaca tucui cai pachapi causaccuna alabana cashcamanta Cantaccunata pushac cuerdayuc tonocunahuan cantachichun, ruhuashca Salmomi. 1 Dioslla, ñucanchicta llaquishpa bendiciaiyari. Cambac cuyaita ricuchishpa cushilla ñahuihuan ricuiyari. 2 Chashna ruhuacpimi, cai pachapica cambac ñanta ricsishpa, can quishpichic cashcatapish tucui llactapi yachangacuna. 3 ¡Dioslla, llactacunapi causaccuna canta alabachun! ¡Tucui llactapica causaccuna canta alabachun! 4 Tucui gentecunataca cashcata ruhuashpami mandangui. Llactacunapi causaccunataca sumacta pushangui. Tucui llactacuna yallita cushicuichic. 5 ¡Dioslla, llactacunapi causaccuna canta alabachun! ¡Tucui llactapica causaccuna canta alabachun! 6 Allpapica granomi pucunga. Ñucanchic Diosmi bendicianga. 7 Dios ñucanchicta bendiciachun. Tucui cai pachapi causaccuna paita manchachun. |
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
United Bible Societies