SALMOS 66 - Dios Rimashcata Quillcashcami

Jatun mancharinacunata ruhuac Diosta alli nishcamanta

Cantaccunata pushac cantachichun, ruhuashca Salmomi.

¹ ¡Tucui cai pachapi causaccuna Diosta cushichishpa alabaichic!

² Paipac sumaimana shutita cantaichic. Paitaca sumac tonohuan alli nichic.

³ Sumac Diostaca: «Can ruhuashcacunaca sumaimana mancharinacunami. Tucuita ruhuac cacpimi, canta piñaccunaca manchaihuan cumurincuna.

⁴ ¡Tucui cai pachapi causaccunami cantaca alli nishpa cantangacuna! ¡Cambac shutitami cantangacuna!» nichicyari.

⁵ Dios imalla ruhuashcacunata ricungapac shamuichic. Tucui ñucanchicpac alli ruhuashcata ricungapac shamuichic.

⁶ Mama cuchatapish chaquichicpimi, chaquishcata pasarcacuna. ¡Chaimantami paihuan cushicunchic!

⁷ Paica tucuita ruhuac cashpami huiñaita mandacun. Paipac ñahuica tucui llactatami chapacun. Paita mana cazuccunaca mana jatun tucungachu.

⁸ Llactacunapi causaccuna ñucanchic Diosta alli nichicyari. Paita cantashpa uyachichicyari.

⁹ Paimi ñucanchic causaita cuidashpa, chaquicuna lluchcarichunpish mana saquirca.

¹⁰ Dioslla, ñucanchictaca llaquichishpami ima shina cacta ricurcangui. Chuya cullquita ruhuangapac rupachic shinami chuyayachircangui.

¹¹ Tucllapimi urmachircangui. Ñucanchic huashapica llashac quipitami churarcangui.

¹² Caballocunapi montashca gentecunahuanmi ñucanchic umata saruchircangui. Nina jahuata, yacu chaupita pasachishpami quipata mai allicunata curcangui.

¹³ Cambac huasimanca canman cushpa tucui rupachina animalhuanmi yaicusha. Canman cusha nishcataca cushatacmi.

¹⁴ Chashnami llaquihuan cashpa, ñuca shimihuan cusha nishcataca pactachisha.

¹⁵ Huira animalcunatami canman cushpa tucui rupachisha. Incienso shina mishquillata ashnachunmi jatun carnerocunata rupachisha. Huagracunatapish, cari chivocunatapish canman cushami.

¹⁶ Diosta tucui manchaccuna, Dios ñucaman imalla allicunata ruhuashcatami huillagrini. Chaita uyangapac shamuichic.

¹⁷ Ñuca shimihuanca paitami caparishpa mañarcani. Ñuca calluhuanca paitami jatunyachircani.

¹⁸ Ñuca shungupi mana allicunata yuyarishca cacpica, Mandac Diosca mana uyanmanchu carca.

¹⁹ ¡Ashtahuanpish Diosca uyarcatacmi! Ñuca mañashpa rimashcata uyarcatacmi.

²⁰ ¡Diosca alli nishca cachun! Ñuca mañashcata mana yangapi saquircachu. Ñucata llaquinatapish mana cungarircachu.