SALMOS 65 - Dios Rimashcata Quillcashcami

Tucuita ruhuac Diosta alabanamanta

Cantaccunata pushac cantachichun, David ruhuashca Salmomi.

¹ Dioslla, canllami Sión urcupica alabashca cana cangui. Canman imata cusha nishcataca pactachishunmi.

² Ñuca mañashcataca uyangui. Tucui runacunami cambacman shamungacuna.

³ Ñuca juchacunallatacmi ñucataca aticun. Shina cacpipish canca perdonanguimi.

⁴ Can acllashpa, cambac cuchuman apamushpa cambac huasi corredorpi causachun churashca runaca cushicuchun. Cambaclla huasipi tiyac sumac allicunata chasquishpami cushicushun.

⁵ Ñucanchicta quishpichic Dioslla, ñucanchic mañacpica, cashcata ruhuashpami cutichingui. Tucui llactacunapi causaccunapish, caru mama cucha llactapi causaccunapish canllatami shuyancuna.

⁶ Canmi urcucunataca cambac poderhuan sinchita ruhuashcangui. Podertaca chumbillirishca shinami charingui.

⁷ Mama cucha yalli huaj nicuctapish, yacucuna manchanayaita jataricpipish canmi casillata ruhuangui. Llactacunapi causaccuna caparinacucpipish, canmi upallachingui.

⁸ Chashna sumaimanata ruhuacta ricushpami, tucui cai pachapi causaccunapish manchancuna. Canmi inti llucshinamanta callarishpa inti tigrana llactacaman cushichingui.

⁹ Cai pachatapish ricungapac shamushpa, tamyachishpami yallita granota pucuchingui. Cambac jatun yacuta tallishpami sumaimana chagrata pucuchingui. ¡Can munashca shinami tucuita ruhuangui!

¹⁰ Yapushca huachucunatapish tamyachishpami pambaclla ruhuangui. Jatun rumiyashca allpacunatapish ñutuyactami ruhuangui. Bendiciashpami muyutapish huiñachingui.

¹¹ Huatapica achcatami pucuchingui. Can purishpapish allicunatami cungui.

¹² Shitashca pambacunapipish, sumac quihuacunami huiñan. Lomacunapish cushilla cac shinami tucun.

¹³ Animalcunapish pamba jundami tucun. Pugru pambacunapish tucui chagrallami. Yallita cushicushpami caparishpa cantancuna.