SALMOS 64 - Dios Rimashcata Quillcashcami

Huañuchingapac huashalla yuyariccunapac maquimanta huacaichichun mañashcamanta

Cantaccunata pushac cantachichun, David ruhuashca Salmomi.

¹ Dioslla, ñuca mañashcata uyaiyari. Ñucata piñaccuna ama manchachichun cuidaiyari.

² Millai runa yuyaita cunamanta huacaichiyari. Huañuchishpa tucuchishun niccunamanta huacaichiyari.

³ Paicunapac callucunataca filo espadata shinami allichincuna. Arcota shitac shinami jayac shimicunata parlancuna.

⁴ Chaihuanmi mana faltayuc runata pacallamanta shitancuna. Chashnami cungailla, imatapish mana manchashpa shitancuna.

⁵ Mana allita ruhuangapacmi paicunapura cushichinacuncuna. Chashna cushichinacushpa, pacalla tucllata churashpaca: «¿Pitac caitaca ricungayari?» nincuna.

⁶ Mana allita ruhuangapacca paicunapurami allita yuyarinacuncuna. Chashnami allita yuyarishpa, tucui shunguhuan ruhuancuna.

⁷ Shina cacpipish, Diosmi paipac flechacunallahuantac chugrichinga. Cungaillami mai llaquicuna japinga.

⁸ Paicunapac rimashcallatacmi llaquipi churanga. Chaita tucui ricuccunaca umata cuyuchishpami burlancuna.

⁹ Chashna ruhuacpimi, tucui gentecuna manchashpa Dios ima ruhuashcata huillangacuna. Shina huillacpimi, pai ruhuashcataca entendingacuna.

¹⁰ Cashcata ruhuac runaca Dios-huan cushicushpami Paipi shunguta churanga. Alli shungucunaca tucuimi cushicungacuna.