SALMOS 63 - Dios Rimashcata Quillcashcami

Almapac cushicunaca Dios cashcamanta

Cai Salmoca shitashca pamba Judapi David ruhuashcami.

¹ ¡Dioslla, ñuca Diosmi cangui! Manarac achicyacpimi cantaca mashcarcani. Ñuca almaca yacunayaihuan shinami canta mashcan. Ñuca cuerpopish can yuyaillami. Yacunayachicuc chaquishca allpa shinami cani.

² Cambaclla huasipi ricushca shinallatacmi, cambac yachaitapish, cambac cushicuitapish ricusha nini.

³ Can llaquishca canaca causaitapish ashtahuan allimi. Chaimantami ñuca shimihuanca canta alabasha.

⁴ Ñuca tucui causaipimi canta alli nisha. Cambac shutipimi ñuca maquita huichai chutasha.

⁵ Ñuca almaca huira aichata micushca shinami cushicunga. Jatun cushicuihuanmi ñuca shimihuan alabasha.

⁶ Ñuca camapi siricushpapish canta yuyarishami. Tuta riccharishca horaspimi cantaca yuyarini.

⁷ Canmi ñucata ayudac cangui. Cambac rigra ucupi cashpami cushicushpa cantasha.

⁸ Ñuca almaca canpi llutarishca shinami. Cambac alli lado maquica ñucata charicunmi.

⁹ Ashtahuanpish ñuca causaita tucuchingapac mashcaccunaca, allpa ucumanmi urmangacuna.

¹⁰ Paicunataca espadahuanmi huañuchingacuna. Paicunataca chacal nishca animalcunami micunga.

¹¹ Ashtahuanpish jatun mandacca Dios-huanmi cushicunga. Maijan cashpapish Diospac shutipi huillaccunaca alli nishcami canga. Mana allita rimaccunapac shimica huichcashcami canga.