SALMOS 62 - Dios Rimashcata Quillcashcami

Diosllapi miticuna cashcamanta

Cantaccunata pushac Jedutún pushashpa cantachun, David ruhuashca Salmomi.

¹ Diosllami ñuca almataca samachin. Paillami ñucataca quishpichin.

² Paica ñuca quishpichicmi, ñuca jarcarina jatun rumimi. Chaimantami pipish mana urmachinga.

³ ¿Ima horascamantac sapalla runataca tuñic shina, mana cashpaca pircata urmachic shina, tucuchingapac tandanacushpa yuyaricunguichic?

⁴ Jatun tiyarinamanta anchuchinallatami yuyaricunguichic. Llullashpallami cushicunguichic. Shimihuan allimi cangui nicushpapish, shungupica llaqui tucuchunmi munacunguichic.

⁵ Ñuca almaca Diosllahuanmi samarin. Paillatami shuyacuni.

⁶ Paillami ñuca quishpichicpish, ñuca jarcarina jatun rumipish can. Paimi ñuca miticuna can, pi mana urmachingachu.

⁷ Diosca ñuca quishpichic, sumaimana achiclla Diosmi. Diosca ñuca miticuna sinchi rumimi.

⁸ Pai acllashcacunalla, tucui punzhacuna paillata shuyaichic. Diosmi ñucanchic miticunami. Chaimanta tucui shunguhuan paipac ñaupapi mañaichic.

⁹ Alli yuyaricpica, yangalla runapish, alli nishca runapish yangallami. Paicunata balanzapi pezacpica huaira shinallami.

¹⁰ Ama imata quichuna, shuhuana yuyailla caichicchu. Imata yallita charishpapish ama chai charishcapi shunguta churaichicchu.

¹¹ Mandac Dios rimashcataca ishcai cutinmi uyarcani. Paica: «Ñucami tucuita ruhuacpish,

¹² llaquicpish, canta Mandac Diospish cani. Ñucami tucuiman imata ruhuashca shinallatac japina cashcata cusha» nirca.