SALMOS 61 - Dios Rimashcata Quillcashcami

Dios cuyac cashcata yuyashpa mañashcamanta

Cantaccunata pushac cuerdayuc tocanacunahuan cantachichun David ruhuashca Salmomi.

¹ Dioslla, ñuca caparishcata uyaiyari. Ñuca mañashcata uyaiyari.

² Ñuca shungu huañugricucpica, allpa tucurimantami canta caparisha. Ñucataca yalli jatun rumi jahuaman pushaiyari.

³ Canmi ñuca miticunaca cangui. Ñucata piñaccunapac ñaupapipish muyundita jatun pircashca shinami jarcarcangui.

⁴ Huiñai huiñaitami canhuan tupana huasipi causasha, cambac alas ucupimi miticusha. Chaipica imata mana manchashachu.

⁵ Dioslla, canman imata ruhuasha nishcataca chasquishcanguimi. Canta manchaccunaman cuna cashcataca cushcanguimi.

⁶ Jatun mandacmanca huahua huahuacaman causachun unai huatacunata cunguiyari.

⁷ Pai cambac ñaupapi huiñaita mandachunca can cuyac cashcahuan, cashcata ruhuac cashcahuan cuidaiyari.

⁸ Chashna ruhuacpica, ñuca tucui causaipimi cambac shutita salmocunahuan cantasha. Ñuca imata cusha nishcatapish punzhantami cusha.