SALMOS 60 - Dios Rimashcata Quillcashcami

Piñaccunata mishangapac ayudachun Diosta cantashcamanta

Cantaccunata pushac lirio sisa tonopi cantachichun ruhuashca cantomi. Cai cantotaca Juab mandac Naharaimhuanpish, Soba llactata mandac Aramhuanpish macanacushpa cutishpa ruhuashcami. Shinallatac cachi pugru pambapipish, Edom llactapipish chunga ishcai huaranga gentecunata huañuchishca quipami Dios ayudashcata yachachingapac David ruhuarca.

¹ Sumac Dioslla, canmi ñucanchicta shitashcangui. Llaqui tucuchunpish saquishcangui. ¡Piñarishca cashpapish ñucanchicta llaquiyari!

² Allpataca tuñirictami chucchuchingui. Ashtahuanmi tuñiricun. Chaitaca allichiyari.

³ Can acllashcacunataca yallitami llaquichishcangui. Machachic vinotami ubiachishcangui.

⁴ Arcocunahuan shitacpi jarcarichunmi canta manchaccunamanca banderata cushcangui.

⁵ Ñuca mañashcata uyashpa cambac cuyashcacunataca cambac alli maquihuan quishpichiyari. Ñuca mañacucta uyaiyari.

⁶ Diosca paipac huasipica: «Ñucaca cushicushpami, Siquem llactata chaupishpa cusha. Sucot pambatapish medishpa cusha.

⁷ Galaad llactapish, Manasés llactapish ñucapacmi. Efraín llactaca ñuca umapi churarina fierromi. Judá llactaca ñuca churashca mandacmi.

⁸ Moab llactaca ñuca armarina bateami. Edom llactapimi ñuca ushutata shitasha. Cutin Filistea llactapica mishashpami, cushicushpa caparisha» nirca.

⁹ ¿Pitac muyundita jatun pircahuan pircashca pueblomanca pushangayari? ¿Pitac Edom llactaman rina ñantaca ricuchingayari?

¹⁰ Dioslla, canmi ñucanchicta shitarcangui. Ñucanchic soldadocunahuanpish ña mana llucshinguichu.

¹¹ Gentecuna ayudashcaca yangallami. Ñucanchicta piñaccunata mishangapac ayudaiyari.

¹² Dios-huanca jatun mancharinacunatami ruhuashun. Paimi ñucanchicta piñaccunata sarunga.