SALMOS 6 - Dios Rimashcata Quillcashcami

Llaquipi cashpa Diosta mañanamanta

Cantaccunata pushac cuerdayuc tocanacunahuan cantachichun David ruhuashca Salmomi.

¹ Mandac Dioslla, ama piñarishpa rimaichuyari. Ama piñarishpa yallita llaquichichuyari.

² Mandac Dioslla, fuerza illacmi cani. Chaimanta ñucata llaquiyari. Mandac Dioslla, ñuca tullucunapish nanaihuanmi chucchucun, chaimanta ñucata allichiyari.

³ Ñuca almapish yallita manchaihuanmi chucchucun. Mandac Dioslla, ¿ima horastac shamugringuiyari?

⁴ Mandac Dioslla, ñuca almata quishpichingapac cutimuiyari. Can cuyac cashcamanta ñucata quishpichiyari.

⁵ Huañushca runaca canta mana yuyari pudinchu. ¿Seolpica pitac cantaca alli ningayari?

⁶ Ñucaca yallita huacashpami shaicushca cani. Tucui tuta yallita huacashpami, huiquihuan saunatapish, camatapish jucuchini.

⁷ Huacacucllapitacmi ñahuipish amsayan. Ñucata piñaccuna huacachicpimi, ñuca ñahuica amsayashpa ña mana ashtahuan ricun.

⁸ Mandac Diosca ñuca huacashpa mañashcata uyashcami. Chaimanta millaita ruhuaccuna ñucapac ñaupamanta anchurichic.

⁹ ¡Mandac Diosca, ñuca mañashcata uyashcami! ¡Ñuca mañashcataca chasquishcami!

¹⁰ Tucui ñucata piñaccunami yallita pingashpa yuyaita chingachingacuna. Cungailla pingaichicpimi callpangacuna.