SALMOS 59 - Dios Rimashcata Quillcashcami

Piñaccunamanta huacaichichun Diosta mañashcamanta

Cantaccunata pushac cantachichun David ruhuashca cantomi. Cai cantotaca ama tucuchichun nishpa llaquilla tonopi cantachichunmi David ruhuashca cantomi. Shinallatac paita huañuchingapac huasipi paita muyunacushca quipami ruhuashca.

¹ Ñuca Dioslla, ñucata piñaccunapac maquimanta quishpichiyari. Ñucata llaquichingapac jatariccunamanta huacaichiyari.

² Millaita ruhuaccunamanta huacaichiyari. Huañuchiccunapac maquimanta quishpichiyari.

³ Mandac Dioslla, ima pandatapish, ima juchatapish mana ruhuashcanichu. Shina cacpipish, sinchi tucushca runacunami huañuchingapac chaparacuncuna.

⁴ Ima llaquita mana ruhuashca cacpipish, tandanacushpami huañuchinata yuyarincuna. Ñucata ayudangapac jatariyari, ñucata ricuiyari.

⁵ Tucuita Mandac Dioslla, israelcunapac Diosmi cangui. Jatarishpa tucui llactacunata llaquichiyari. Canta cariyashpa millaita ruhuaccunataca maijanllatapish ama llaquichu.

⁶ Tutayacucta paicuna cutishpaca, allcucuna shinami aullashpa pueblota muyuncuna.

⁷ Paicunaca: «Ñucanchictaca pi mana uyangachu» nincunami. Chai shimicunaca espada shinami.

⁸ Ashtahuanpish Mandac Dioslla, paicunataca asinguimi. Shuctac llactacunataca burlanguimi.

⁹ Can Diosmi ñucapac miticuna jatun pirca shina cangui. Chaimantami canllapi shunguta churashpa shuyani.

¹⁰ Ñucata llaquic Dioslla, ñucata piñaccunata ñuca yuyashca shinata ruhuashpa ricuchingapacmi ñaupashpa ringui.

¹¹ Ñuca llacta gentecuna ama cungarichunca paicunataca ama huañuchinguichu. Cambac poderhuan maita cachashpa llaquichiyari. Can Mandac Diosca ñucanchic jarcarina escudomi cangui.

¹² Paicunapac shimihuan juchallishcamanta, paicunapac shimihuan llaquichishcamanta, paicuna jatun tucushpa rimashcamanta, llaqui tucuchun nishcamanta, llullashpa rimashcamantaca prezushca cachun.

¹³ Piñarishpa tucuchiyari. Paicuna ama ashtahuan ricurichun chingachiyari. Chashna ruhuacpimi, can Diosca Jacobopac huahuacunamanta callarishpa tucui cai pachata mandacushcata yachangacuna.

¹⁴ ¡Tutayacucta paicuna cutishpaca allcucuna shina aullashpa, pueblota muyuchun!

¹⁵ Paicunaca micunata mashcashpa maita puriccunalla cachun. Huicsa pactata mana micushpaca tucui tuta huacashpa pacarichun.

¹⁶ Canca ñuca miticuna jatun pirca shinami cangui. Shinallatac llaqui punzhacunapi ñucata llaquicmi cangui. Tutamanta utca jatarishpami canta alabasha.

¹⁷ Muyundita jatun pircashca shina ñucata pacaclla, cantami cantasha. Dioslla, ñuca miticunami cangui. Ñucata llaquic Diosmi cangui.