SALMOS 58 - Dios Rimashcata Quillcashcami

Millaicunata llaquichichun mañashpa cantashcamanta

Cantaccunata pushac cantachichun David ruhuashca cantomi. Cai cantotaca ama tucuchichun nishca tonopi cantachichun David ruhuashca sumac cantomi.

¹ Tandanacushca mandaccunalla, ¿cancunapac shimihuanca cashcatatacchu rimanguichic? Huañuclla runacunata ima llaqui japicpica, ¿cashcata ruhuashpachu allichinguichic?

² Ashtahuanpish cancunapac shungupica millaita ruhuanallatami yuyacunguichic. Cancunapac maquihuan millaita ruhuashcaca cai allpapimi jundashca.

³ Diosta mana manchac millai runacunaca mamapac huicsapi tiyarishcamanta pachami Diosmanta anchurircacuna. Sajuarishcamanta pachami llullashpa chingarircacuna.

⁴ Culebra shina venenoyucmi cancuna. Mana uyac culebra shinami mana uyancuna.

⁵ Muspachinata alli yachac brujo allita tocacpipish, mana uyanchu.

⁶ Dioslla, quirucunata paquiyari. Mandac Dioslla, chai leoncunapac quirucunata shic-huaiyari.

⁷ Tallishca yacu shina chingarichun. Paicunapac flechacunata shitacpipish, caspi puntallapitac ñuturichun.

⁸ Babusa shina chingarichun. Shullushca huahua shina achic punzhata ama ricuchun.

⁹ Chaquishca cashacuna manga yacuta manarac cunuchishpa tucuric shina chingarichun. Verdinlla quihuata acapana huaira apac shina chingarichun.

¹⁰ Cashcata ruhuaccunaca millaicunata Dios llaquichicpica cushicungami. Diosta mana manchaccunapac yahuarhuanmi chaquita jahuangacuna.

¹¹ Shina cacpimi runaca: «Cashcata ruhuaccunaca allitami japina. Cai pachapi causaccunata taripacca sumac Diosmi» ningacuna.