SALMOS 57 - Dios Rimashcata Quillcashcami

Huañuchingapac catic runapac maquimanta quishpichichun cantashcamanta

Cantaccunata pushac cantachichun ruhuashca cantomi. Cai cantotaca ama tucuchichun nishpa, cantana tonopi cantachichunmi ruhuashca. Shinallatac Saulmanta miticushpa machaipi cashpami, Davidca sumac cantota ruhuashca.

¹ Ñuca Dioslla, ñucata llaquiyari, ñucata llaquiyari. Canpimi ñuca shunguta churani. Cai jatun llaqui pasangacaman cambac alas ucupi miticusha.

² Jahua pachapi causac Diosllatami mañasha. Paica imatapish ayudanmi.

³ Pai Diosmi jahua pachamanta cashcata nic, llaquic cashcata ricuchishpa ñucata huañuchisha niccunamanta quishpichinga.

⁴ Ñucaca leoncunapac chaupipi shina, ninata shimiman shitac shina gentecunapac chaupipimi cani. Paicunapac quirucunaca lanzacuna shina, flechacuna shinami. Paicunapac calluca filosapa espada shinami.

⁵ ¡Dioslla, cantaca jahua pachapi jatunyachishca cachun! ¡Can sumaimana cashcataca tucui cai pachapi ricsishca cachun!

⁶ Ñuca purina ñanpica tucllallatami churarcacuna. Ñuca almaca llaquihuanmi shaicushca. Ñuca ñaupapimi jatun jutcuta ruhuancuna. Chaipica paicunallatacmi urmancuna.

⁷ Dioslla, ñuca shunguca canta alabana yuyaillami. Shungupica chai yuyaillami cani. Salmocunahuanmi cantasha nini.

⁸ ¡Ñuca almalla, ricchariyari! ¡Arpapish, salteriopish ricchariyari! Mushuc punzhata ricuchishpami riccharisha.

⁹ Jatun Dioslla, tucui gentecunapac chaupipimi canta alabasha. Tucui llactacunapac chaupipimi salmocunata cantasha.

¹⁰ Can llaquic cashcaca jahua pachacaman jatunmi. Can cashcata nic cashcaca puyucaman jatunmi.

¹¹ ¡Dioslla, cantaca jahua pachapi jatunyachishca cachun! ¡Can sumaimana cashcataca tucui cai pachapi ricsishca cachun!