SALMOS 56 - Dios Rimashcata Quillcashcami

Diospi shunguta churashpa mañanamanta

Cantaccunata pushac cantachichun ruhuashca cantomi. Cai cantotaca huasimanta carupi cashpa llaquilla puric palomita tonopi cantachichun ruhuashcami. Shinallatac Gat pueblopi filisteocuna japishpa, huañuchishun nishca quipami Davidca cai sumac cantota ruhuashca.

¹ Ñuca Dioslla, ñucata llaquichingapac caticuncunami. Chaimanta ñucataca llaquiyari. Punzhantami llaquichincuna.

² Ñucata piñaccunaca punzhantami llaquichincuna. Jatun tucushpami huaicashpa ñucata huañuchishun nincuna.

³ Paicuna manchachicpica, canllapimi shunguta churani.

⁴ Can Diospac rimashcatami alabani. Canpimi shunguta churani. ¿Huañuclla gentecunaca imatatac ruhuai pudingayari?

⁵ Punzhantami llullashpa llaquichincuna. Ñucata llaquichinallatami yuyacuncuna.

⁶ Tandanacushpa miticushpami, ñuca maita ricta chaparancuna. Japishpa huañuchingapacmi maita ricpipish catirancuna.

⁷ Ñuca Dioslla, paicuna millaita ruhuashca shinallatac llaquichiyari. ¡Nina japiric shina piñarishpa gentecunataca tucuchiyari!

⁸ Canmi ñuca purishcatapish yupashca shina tucuita yachangui. Ñuca huiquitapish tandashpami charicungui. Tucuitami quillcashpa charicungui.

⁹ Ñuca canta mañai punzhaca ñucata piñaccunaca cutishpa callpangacunami. Dios ñuca ladopi cashcataca yachanitacmi.

¹⁰ Can Dios rimashcatami alabani. Can Mandac Diospac rimashcatami alabani.

¹¹ Can Diospimi shunguta churani. Runa imata ruhuanamantaca mana manchanichu.

¹² Ñuca Dioslla, canman imata ruhuasha nishcataca pactachishatacmi. Canta pagui nishpa cunatapish cushatacmi.

¹³ Ñuca causaitaca huañuimantami quishpichircangui. Cambac ñaupapi purichunmi ñuca urmagricucpipish charirarcangui. Cambac ñaupapi achic punzhata ricushpa causachunmi chashna quishpichircangui.