SALMOS 55 - Dios Rimashcata Quillcashcami

Apanacuc cashca jahua llaquichic runata tucuchichun Diosta mañashcamanta

Cantaccunata pushac cuerdayuc tocanacunahuan cantachichun yachachingapac David ruhuashca Salmomi

¹ Ñuca Dioslla, ñuca mañashcata uyaiyari. Ñuca mañacucpica, ama anchurichu.

² Llaquihuan cashpa mañashcata uyashpa chashquiyari. Yallita llaquihuan cashpami yuyai illac shina cani.

³ Ñucata piñaccuna camishcamanta, millai gentecuna llaquichishcamanta, yanga juchanchishcamanta, huañuchisha nishcamantami cashna llaquihuan cani.

⁴ Ñuca shunguca nanaihuanmi tucuricun. Huañuna manchaimi ñucataca ñitic shina charicun.

⁵ Yallita manchai pillushpa charicuc shina cacpimi chucchucuni.

⁶ Chaimantami ñucaca: «¡Paloma shina alasyuc cashpaca, volashpa maipi samanata mashcagrimanchari!

⁷ Mai caruta rishpami shitashca pambapi pacarigriman.

⁸ Acapana huaira shina, mancharina tamya shina, caticuc gentecunamantaca callparishpachari miticugriman» yuyani.

⁹ Mandac Dioslla, paicunataca tucuchiyari. Paicunapac rimaitaca pandachiyari. Pueblopica llaquichinacucta, camishpa rimanacuctapimi ricuni.

¹⁰ Tutai punzhami jatun pirca jahuata ricushpa muyuncuna. Pueblo ucupica millaita ruhuaccuna, llaquichiccunami jundashca.

¹¹ Paicunapac chaupipica millaita ruhuanallami tiyan. Plaza pambacunapica llullashpa umanaca mana illanchu.

¹² Ñucata piñac runa ñucata llaquichishca cacpica, llaquita apaimanllami carcani. Ñucata mana ricunayachic llaquichingapac jatarishca cacpica, miticuimanllami carcani.

¹³ Ashtahuanpish can, ñuca shinallatac cac, ñucahuan puricllatac, ñucahuan alli apanacucllatac llaquichingapac jatarishcangui.

¹⁴ Canhuanmi pi mana yachashcatapish, sumacta parlanacuc carcanchic. Diospac huasipipish ishcai tucushpami sumacta cushilla puric carcanchic.

¹⁵ Cungailla huañui japichun, Seolman causac chayagrishca cachun. Paicunapac huasipipish, paicunapac chaupipish millaillatami ruhuancuna.

¹⁶ Ashtahuanpish ñucaca, Diostami caparishpa mañasha, Paica ñucata quishpichingami.

¹⁷ Tutamantapish, chaupi punzhapish, chishipish Diosta caparishpa mañashami. Paica ñuca mañashcata uyangami.

¹⁸ Ñucata piñaccuna tauca tucushpa huaicashpa huañuchingapac shamucpipish, paimi ñuca causaita quishpichinga.

¹⁹ Huiñaita causac Diosmi ñuca mañashcata uyashpa, paicunataca llaquichinga. Paicuna tucui tucushpa Diostapish mana manchashcamantami chashnaca llaquichinga.

²⁰ Millai runaca paihuan apanacucllatatac llaquichishpami, sumacta causangapac ari nishcatapish paquin.

²¹ Paipac rimashca shimicuna mantequilla shina ñutunlla cashpapish, paipac shungupica macanacuna yuyaillami can. Aceitetapish yalli ñutunlla rimaicunata parlashpapish espadata bainamanta llucchishpa charicuc shinami can.

²² Cambac llaquitaca Diosman mingai. Paica ayudangami. Cashcata ruhuactaca jaicapi mana urmachun saquingachu.

²³ Ñuca Dioslla, huañuchiccuna, llullaccunaca mana unaita causangachu. Paicunataca chingarina jatun jutcumanmi shitangui. Ashtahuanpish ñucaca canllapimi shunguta churani.