SALMOS 54 - Dios Rimashcata Quillcashcami

Piñaccuna ama llaquichichun Diosta mañanamanta

Cantaccunata pushac cuerdayuc tocanacunahuan cantachichun David ruhuashca Salmomi. Cai Salmoca Zif llactapi causaccuna Saulpacman shamushpa: «Davidca ñucanchic llactapimi miticushpa tiyacun. ¿Chaitaca manachu yachangui?» nishpa tapushcata yachachingapac ruhuashcami can.

¹ Sumac Dioslla, cambac shutimanta ñucata quishpichiyari. Cambac poderhuan ñucata misaiyari.

² Dioslla, ñuca mañashcata uyaiyari. Ñuca ima nishcata chasquiyari.

³ Mana ricsishcacunami ñucataca llaquichingapac jatarishca. Jatun llaquita ruhuaccunami ñucata huañuchingapac mashcacuncuna. Can Diostaca imalaya mana yuyarincunachu.

⁴ Mandac Diosmi ñucata ayudan. Ñucata cuidaccunataca Mandac Diosmi pushacun.

⁵ Paillatacmi ñucata piñaccunamanca mana allita cutichinga. ¡Cashcata nic cashcamanta tucuchiyari!

⁶ Mandac Dioslla, can alli cashcamanta alabashami. Cushicushpami ñucallatac canman curisha.

⁷ Can llaquimanta quishpichishcamantami chashna alabasha. Ñucata piñaccunata can llaquichicuctaca ñuca ñahuihuantacmi ricuni.