SALMOS 53 - Dios Rimashcata Quillcashcami

Tucui gentecuna ismushca shina mana alli cashcamanta

Cantaccunata pushac llaquilla tonohuan pushashpa cantachun ruhuashca Salmomi. Cai Salmotaca Davidmi yachachingapac ruhuashca.

¹ Mana entendic runaca: «Diosca mana tiyanchu» nishpami yuyan. Tucuimi millana juchacunata ruhuashpa ismushca shina tucushcacuna. Shucllapish allita ruhuacca mana tiyanchu.

² Diosca huañuclla gentecunapurapi shucllapish alli yuyaiyuc, Diosta mashcac tiyangami nishpami, jahua pachamanta tucuita ricurca.

³ Ashtahuanpish tucuimi chingarishpa ismushca shina tucushcacuna. Allita ruhuacca pi mana tiyanchu. Shucllapish mana tiyanchu.

⁴ Mandac Diosta mana mañac, millai ruhuac gentecunaca mana entendincunachu. Ñuca acllashcacunataca tandata micuc shinami tucuchincuna.

⁵ Chai gentecunaca Dios paita piñaccunapac tullucunata chirapashcamantami mana pi manchachicucpipish yallita manchaihuan chucchuncuna. Dios shitashcamantami canca pingaichircangui.

⁶ ¡Israelcunata quishpichingapacca Sionmanta shamushca canmanlla! Dios pai acllashcacunata prezu cashcamanta cutichimucpica, Jacobopac huahua tucui israelcunami yallita cushicunga.