SALMOS 52 - Dios Rimashcata Quillcashcami

Jatun tucuccunaca yangalla cashcamanta

Cantaccunata pushac cantachichun David allichishca Salmomi. Cai Salmotaca Edom llactamanta Doeg Saulpacman shamushpa: «Davidca Abimelecpac huasiman shamushcami» nishpa, huillashcata yachachingapacmi ruhuashca.

¹ Jatun poderta charic runalla, ¿ima nishpatac mana allita ruhuashpa jatun tucunguiyari? Diosca punzhantami cuyacun.

² Cambac calluca punzhantami llaquichin. Llullangapacca navaja mulashca shinami.

³ Allita ruhuanapac randica mana allitaracmi cuyac shina ruhuashcangui. Cashcata ninapac randica llullanatami ashtahuan munangui.

⁴ Llullac callulla, millaita rimanallatacmi munangui.

⁵ Chaimantami Diosca cantaca causaita quichushpa huiñaipac chingachishpa, cambac huasi ucupuramanta anchuchinga. Cai pachapi causaccunapuramanta sapimanta llucchic shinami cantaca chingachinga.

⁶ Cashcata ruhuaccuna chaita ricushpaca mancharingami. Chai runata ricushpa asishpaca:

⁷ «¡Riquichic, chai runaca Diosta paipac jatun pirca shina jarcac cachunca mana chasquircachu! ¡Ashtahuanpish paipac charishcacunallapi shunguta churashpami, mana allicunallata ruhuashpa causarca!» ningacuna.

⁸ Ashtahuanpish ñucaca verdinlla olivos yura shinami Diospac huasipica cani. Dios llaquishcamantaca huiñaitami paipi shunguta churashpa causasha.

⁹ Sumac Dioslla, cai tucuita ruhuashcamantaca tucui causaipimi alabacusha. Cambaclla caccunapac ñaupapimi canllata shuyasha. Canca allimi cangui.