SALMOS 51 - Dios Rimashcata Quillcashcami

Juchata perdonachun Diosta mañashcamanta

Cantaccunata pushac cantachichun, David ruhuashca Salmomi. Cai Salmotaca Betsabé huarmihuan chayarinacushcamanta Dios ima nishcata huillac Natán shamushca quipami ruhuarca.

¹ Ñuca Dioslla, can llaquic cashca shinallatac ñucata llaquiyari. Can yallita llaquic cashcamanta ñuca mana cazushcata pichaiyari.

² Ñuca mapata ruhuashcataca cutinpish cutinpish pichaiyari. Ñuca juchacunataca anchuchiyari.

³ Canta mana cazushcataca shungumantami llaquirini. Chai juchata ruhuashcaca yuyachicunllami.

⁴ Cantami yallita llaquichishcani. Can mana munashcatami ruhuashcani. Chaimanta juchanchinatacmi cani. Ñuca juchamanta llaquichicpica, imata mana ni pudinichu.

⁵ Ñuca mamapac huicsamanta pachami juchayuc cashcani. Ñuca mamaca juchayuctami huicsayuc tucushca.

⁶ Canca imatapish cashcata nictami cuyangui. Pacallami ñuca shungupi allita yachachishcangui.

⁷ Hisopu sachahuan pichayari, chaipica chuyami casha. Ñucataca jahuaiyari, can jahuapica rasutapish yalli yuranllami casha.

⁸ Yallita cushi canata huillaiyari. Chaipica can llaquichishca tullucunapish cushicungami.

⁹ Ñuca juchacunataca ama ricuichu. Tucui ñuca mapacunata pichailla.

¹⁰ Ñuca Dioslla, ñucataca chuya shunguta ruhuaiyari. Allita ruhuac Espirituta ñucapica cutin churaiyari.

¹¹ Cambac ñaupamantaca amatac anchuchichu. Cambaclla Espiritutapish ñucamanta ama quichuichu.

¹² Can ñucata quishpichishcamanta cushicuitaca cutinllatac cuiyari. Cazuna yuyaita cuc Espirituta pushachun cuiyari.

¹³ Chashna pushacpica, canta mana cazuccunamanmi can mandashcataca yachachisha. Chashna ruhuacpica, juchata ruhuaccunaca cambacmanmi cutimungacuna.

¹⁴ Ñucata quishpichic Dioslla, huañuchiccunamanta huacaichiyari. Can cashcata ruhuac cashcamantami ñuca calluhuanca canta cantasha.

¹⁵ Jatun Dioslla, ñuca shimita pascaiyari. Chaipica, tucuipac ñaupapimi alli nishpa cantasha.

¹⁶ Animalta canman cushpa huañuchichunpish, animalta canman cushpa tucui rupachichunpish mana munanguichu.

¹⁷ Can Diosca animalta chasquinapac randica shungu paquirishcatami chasquingui. Dioslla, shungumanta llaquirishpa cambacman cuchuyactaca mana piñanguichu.

¹⁸ Can cuyashcamanta Sión urcupac allita ruhuaiyari. Jerusalén muyundi pircata cutin shayachiyari.

¹⁹ Chashna tucui allichishca cacpimi, animalta cushpa huañuchicpipish, canman alli cacpi chasquingui. Animalta cushpa tucui rupachicpipish chasquinguimi. Cambac altarpimi becicunata cushpa rupachishun.