SALMOS 50 - Dios Rimashcata Quillcashcami

Mandac Diosca cashcata ruhuac juez cashcamanta

Asaf cantashca Salmomi.

¹ Cancunata Mandac Dios, tucui dioscunapac Diosmi rimarca. Paimi cai pachapi causaccunataca inti llucshina ladomanta inti tigrana ladocaman tandanacuchun cayashca.

² Tucuita yalli sumac Sión urcumantami Diosca achicyachishca.

³ Ñucanchic Diosca mana upalla shamungachu. Paipac ñaupataca tucuchic ninahuan, paipac muyunditaca acapana huairahuanmi shamunga.

⁴ Pai acllashcacunata taripangapacmi jahua pachatapish, cai pachatapish cayanga.

⁵ Paica: «Animalcunata ñucaman cushpa ñucahuan ari ninacushpa ñucapaclla causaccunata tandachichic» nirca.

⁶ Can Diosca juezmi cangui. Chaimantami cashcata can ruhuashcataca jahua pacha huillanga.

⁷ Diosca: «Ñuca acllashcacunalla, ñuca rimashcata uyaichic. Israelcunalla, ñucami cambac contra rimagrini. Ñucaca Diosmi cani. Cancunapac Diosmi cani.

⁸ Animalta cushcamantapish, ñuca ñaupapi animalcunata cushpa tucui rupachishcamantapish, mana imata ninichu.

⁹ Cambac picotamanta huagracunatapish, manadamanta cari chivocunatapish, mana ñucaman cuchun munanichu.

¹⁰ Chaica, sacha animalcunapish, urcucunapi causac huaranga huaranga animalcunapish tucuimi ñucapac.

¹¹ Tucui volac animalcunatapish, pambapi causac tucui animalcunatapish ricsinimi.

¹² Tucui cai pachapish, chaipi tucui ima tiyacpish ñucapacmi. Chaimantaca yarcaihuan cashpapish, canmanca mana mañaimanchu.

¹³ ¿Ñucaca huagra aichata micushpachu causani? ¿Cari chivo yahuarta ubiashpachu causani?

¹⁴ ¡Jahua pachapi causac Ñucaman imata cushpa pagui ni! Ñucaman cusha nishcata pactachi.

¹⁵ Llaqui punzhacunapi cashpa, ñucata mañangui. Ñuca llaquimanta llucchicpica, ñucata alli ningui» ninmi.

¹⁶ Ashtahuanpish Diosca millaita ruhuactaca: «Canca ñuca mandashcacunataca ima ninata mana charinguichu. Ñucahuan ari nishcatapish, cambac shimihuanca mana rimanachu cangui.

¹⁷ Ñuca cunacpipish piñaringuimi. Ñuca rimashcatapish mana uyasha nishpa saquinguimi.

¹⁸ Shuhuac ricuricpica, sumactami chasquingui. Huainayaccunahuanmi pacta puringui.

¹⁹ Cambac shimica millaillatacmi rimangui. Cambac calluca llullami can.

²⁰ Cambac huauquillatatac huashalla rimangapacmi tiyaringui. Cambac mamapac huahuallatatacmi llaquichingui.

²¹ Chai tucuita ruhuacucpipish upalla saquircanillami. Ñucataca can shina cashcatami yuyangui. Ashtahuanpish can chai millaita ruhuashcata ricuchishpami llaquichigrini.

²² Ñucata cungarishpa causaccuna caita alli yuyarichic. Pacta cancunata tucui tucuchiman. Chashna tucuchicucpica pi mana quishpichingachu.

²³ Maijanpish animalta ñucaman cushpa alli nicmi, ñucataca jatunyachinga. Paipac causaita allichicmanmi ñuca quishpichic cashcataca huillasha» ninmi.