SALMOS 5 - Dios Rimashcata Quillcashcami

Punzhapi cuidachun Diosta mañanamanta

Cantaccunata pushac flautacunapi tocashpa cantachichun David ruhuashca Salmomi.

¹ Mandac Dioslla, ñuca rimashcacunata uyaiyari. Ñuca shungu llaquiricushcata ricuiyari.

² Jatun Mandac ñuca Dioslla, ñuca caparishpa mañashcata uyaiyari. Ñucaca canllatami mañani.

³ Tutamanta ñuca caparishpa mañashcata uyanguiyari. Tutamanta cambac ñaupapi mañashpami shuyacusha.

⁴ Canca millaita ruhuaccunahuan cushicuc Diosca mana canguichu. Millaicunaca cambac ladopica mana causangachu.

⁵ Jatun tucushcacunaca cambac ñaupapica mana ricuri pudingachu. Canca millaita ruhuaccunata piñacmi cangui.

⁶ Llullashpa parlaccunatapish, huañuchiccunatapish, umaccunatapish chingachinguimi. Mandac Dioslla, chai gentecunataca millanayachinguimi.

⁷ Shina cacpipish ñucaca can yallita llaquic cashcamantami cambac huasiman yaicusha. Ñucaca cambaclla huasiman ñahuita churashpami cambac ñaupapi cumurini.

⁸ Mandac Dioslla, ñucata piñaccuna llaquichigricucpica, cashcata ruhuachishpa pushaiyari. Cambac alli ñanta pushaiyari.

⁹ Paicunaca llullallatami rimancuna. Paicunapac shunguca millai jundami. Paicunapac cungurica enterrana jutcuta pascashca shinami.

¹⁰ Ñuca Dioslla, paicunataca llaquichiyari. Paicuna imata ruhuanata yuyarishcallapitac urmachiyari. Paicunaca canta llaquichishpami yalli millaita ruhuarcacuna. Chaimanta paicunataca anchuchiyari.

¹¹ Ashtahuanpish canpi shunguta churaccunaca cushicuchun. Can paicunata cuidac cashcamantaca huiñaita cushicuihuan cantachun. Canta cuyaccunaca cushicuchun.

¹² Can Mandac Diosllami cashcata ruhuaccunamanca bendiciangui. Cambac cuyaihuanmi escudohuan muyundita jarcac shina cuidangui.