SALMOS 49 - Dios Rimashcata Quillcashcami

Charishcallahuan mana cushicuna cashcamanta

Cantaccunata pushac cantachichun, Corepac churicuna ruhuashca Salmomi.

¹ Tucui llactacuna caita uyaichic. Cai pachapi tucui causaccuna caita uyaichic.

² Alli nishca gentecunapish, yangalla gentecunapish, chayuccunapish, huacchacunapish tucui mashna uyaichic.

³ Ñuca shimihuanca alli yachaitami rimagrini. Ñuca shunguhuanca alli yuyaitami cugrini.

⁴ Yuyaita japina rimaicunahuan rimashcataca uyashami. Mana entendipac rimaicunataca arpapi tocashpami huillasha.

⁵ Ñucata piñaccuna llaquichicucpi, millai yuyaihuan ñucata muyucucpica, ¿imamantatac manchashayari?

⁶ Ima charishcahuan cushicuccunaca paicuna yallita charishcahuanmi jatun tucuncuna.

⁷ Shina cashpapish chai charishcahuanca pita mana quishpichi pudinchu. Shinallatac paipish Diosman imata cushpa mana quishpiri pudinchu.

⁸ Causaita quishpichingapacca mashna cullquipish mana pactanchu. Cullquihuanca manatac randi pudinchu.

⁹ Huiñaita mana huañushpa causasha nishpapish mana cullquita cui pudinchu.

¹⁰ Yachaccunapish huañunllatacmi. Rumi shungu runapish, mana entendic runapish chingarinllami. Paicuna charishcacunaca shuccunapacmi saquirin.

¹¹ Paicunapac allpata paicunapac shutipi churacpipish, paicunapac huiñaita causana huasica enterrarina jutcumi. Chaimi huahua huahuacunapac causana huasica can.

¹² Runaca mashnata charic cashpapish mana huiñaita causai pudinchu. Ashtahuanpish animalcuna shinami tucurinlla.

¹³ Chashnami quiquin charishcahuan cushicuccunaca tucun. Paicunata caticcunapish paicuna yuyashcallatatac catishpami cushicuncuna. Chashnami paicunallatac allimi cani niriccunaca tucun.

¹⁴ Paicunataca huañuimi manada ovejata shina Seolman pushanga. Chaipica huañuimi michic shina cuidanga. Tutamanta pacarinataca allita ruhuashpa causaccunami paicunataca chaqui ucupi churashpa mandangacuna. Seolmi paicunapac causana huasica canga.

¹⁵ Ashtahuanpish ñucataca Seolmantami quishpichinga. Paimi ñucataca pushanga.

¹⁶ Maijan chayucyacpipish, paipac huasipi sumaimanacuna tiyacpica, ama mancharinguichu.

¹⁷ Pai huañushpaca imata mana apangachu. Shinallatac paipac charishca sumaimanacunapish mana paihuan ringachu.

¹⁸ Pai causacushpa shungupi cushilla cashpapish, pai chayuc cashcamanta tucuipac alli nishca cashpapish

¹⁹ huañushpaca paipac ñaupa taitacunahuanmi tandanacugringa. Chashna tucushpaca achic punzhataca jaicapi mana ricungachu.

²⁰ Tucuita charic cashpapish, yuyai illac runaca chingaric animalcuna shinami huañun.