SALMOS 48 - Dios Rimashcata Quillcashcami

Sión pueblo Mandac Diospac cashcamanta

Corepac huahuacuna cantashca Salmomi.

¹ ¡Mandac Diosca paipac urcupi tiyac paipaclla pueblopica, yallita alli nishcami cana can!

² ¡Chai urcuca mai sumacmi! Jatun mandacpac pueblo jahua ladopi cac Sión urcuca cai pachapi causaccunapac mai cushicunami.

³ Chai pueblopi tiyac mandana huasipica Mandac Diosmi tiyacun. Paica tucuipac ricsishca samarina Diosmi can.

⁴ Tucui cai pachata jatun mandaccunami tandanacushpa macanacungapac shamurca.

⁵ Shina shamushpapish chai pueblopi Dios causacushcata ricushpami imatapish mana ruhuai pudishpa, cutishpa callparcacuna.

⁶ Chaipica yallitami paicunaca manchaihuan carcacuna. Huarmita sajuarina nanai japishca shinami tucurcacuna.

⁷ Canca inti llucshina ladomanta huairata cachashpami, Tarsis llacta barcocunata paquircangui.

⁸ Ñucanchic uyashca shinallatacmi tucuita Mandac ñucanchic Diospac pueblopi ricushcanchic. Diosca chai pueblotaca huiñaipac mana cuyuchipactami ruhuanga.

⁹ Sumac Dioslla, cambac huasipimi can llaquic cashcataca yuyarinchic.

¹⁰ Sumac Dioslla, cambac shutita alli nina cashca shinallatacmi cantaca tucui cai pachapi causaccuna alli nincuna. Cambac alli maquihuanca cashcatami ruhuangui.

¹¹ Can cashcata ruhuashcamantaca Sión urcupipish, Judá llactapi causaccunapish yallitami cushicunga.

¹² Sión pueblo muyundita purigrichic. Mashna torrecuna tiyashcata yupaichic.

¹³ Cancunapac quipa huahuacunaman huillangapac chai canzha lado pircatapish, mandana huasicunatapish allita ricugrichic.

¹⁴ Sumac Diosca huiñai huiñaipac ñucanchic Diosmari. Paimi huiñaita ñucanchictaca pushanga.