SALMOS 47 - Dios Rimashcata Quillcashcami

Diosca tucui cai pachata mandac cashcamanta

Cantaccunata pushac cantachichun, Corepac churicuna ruhuashca Salmomi.

¹ ¡Tucui llactapi causaccuna maquita huactaichicyari! ¡Yallita cushicushpa caparishpa Diosta cantaichicyari!

² Jahua pachapi causac Mandac Diosca manchana jatun Diosmi. Tucui cai pachata jatun Mandacmi.

³ Paimi llactapi causaccunata ñucanchic mandachun churashpa, paicunataca ñucanchic chaqui ucupi churanga.

⁴ Paimi, pai cuyashca Jacobopac sumac llactata ñucanchicman acllashpa curca

⁵ Mandac Diosca yallita cushicushpa, trompetacunapi tocashpa cantashcahuanmi huichai rirca.

⁶ ¡Cantaichic, ñucanchic Diostaca cantaichicyari! ¡Cantaichic, ñucanchicta jatun Mandacta cantaichicyari!

⁷ Dios tucui cai pachata jatun mandac cashcamantaca sumac cantocunahuan cantaichicyari.

⁸ ¡Diosca tucui llactacunatami mandacun! ¡Diosca chicanyachishca paipaclla tiyanapi tiyashpami mandacun!

⁹ Llactacunata mandaccunaca Abrahampac Dios acllashcacunahuanmi tandanacushca.

¹⁰ Tucui cai pacha mandaccunaca Diospacmi. ¡Paica tucuita atishpa jatun mandacmi!