SALMOS 45 - Dios Rimashcata Quillcashcami

Jatun mandac cazaracucpi cantanamanta

Cantaccunata pushac lirio sisa tonopi cantachichun, Corepac churicuna ruhuashca Salmomi. Cuyanamanta cantachunmi yachachirca.

¹ Ñuca shungumantaca sumac shimicunami llucshin. Jatun mandacmanmi cantacuni. Ñuca calluca utca quillcac runapac quillcana pluma shinami.

² Tucui caricunamanta yalli sumacmi cangui. Cambac shimimantaca uyanalla shimicunami llucshin. Diosmi huiñaita chashna cachun bendiciarca.

³ Yalli sinchi runalla, cambac espadata cinturapi huarcuchiyari. Cambac sumac cashcahuanpish, mandana poderhuanpish chumbilliriyari.

⁴ Can sumaimana cashcamantaca, tucuipimi alli llucshingui. Cambac poderhuanmi carretata caballocunapi aisachishpa yangalla shinacunaman cashcata ruhuangapac, mana llullac cashcahuan millaita ruhuaccunata llaquichingui. Alli maquihuanca mai mancharinacunatami ruhuangui.

⁵ Pueblocunapi causaccunaca cambac chaqui ucupimi urmanga. Cambac filosapa flechacunaca can jatun mandacta piñaccunapac shungutami chaupishpa pasanga.

⁶ Ñuca Dioslla, can mandashpa tiyanaca huiñai huiñaipacmi. Cambac varahuanmi cashcata ruhuashpa mandangui.

⁷ Canca cashcata ruhuactami cuyangui. Millaita ruhuactaca piñanguimi. Chaimantami cambac Diosca can jatun mandacta acllashca. Mishquilla ashnacuc aceitehuan cahuishpami, canhuan puric caishuccunamanta yalli cushicuita cushca.

⁸ Cambac tucui churanacunapish mirra, áloes, canela shinami mishquilla ashnacun. Marfilmanta ruhuashca can mandashpa tiyana huasicunapimi cantaccunaca cantashpa cushichincuna.

⁹ Cambac huasipi tiyaccunapurapica jatun mandaccunapac ushicunami tiyacun. Cambac alli lado maquimanca jatun mandac huarmimi Ofir llacta curi churanahuan tiyacun.

¹⁰ Riqui ñuca huahualla, cambac ringrita mañachishpa uyai. Cambac llacta gentecunatapish, familiatapish cungarilla.

¹¹ Can sumac huarmitaca jatun mandacmi cuyan. Paica cambac jatun mandacmari. Chaimantami paipac ñaupapi cumurina cangui.

¹² Tiro pueblopi causaccunami convidanacunahuan cambacman shamun. Chayuccunapish cambac ñaupapi alli ricuringapacmi convidanacunahuan shamun.

¹³ Jatun mandacpac ushica curihuan sumacta ruhuashca churanata churashcami tiyacun.

¹⁴ Bordashca churanahuanmi jatun mandacpacman pushashca canga. Carihuan manarac chayarishca solteracunami paitaca pushanga.

¹⁵ Yallita cushicushpami jatun mandac mandashpa tiyana huasiman apamushca cangacuna.

¹⁶ Cancunapac taitacunapac randica cancunapac churicunami tiyaringa. Paicunatami tucui llactata mandac cachun churangui.

¹⁷ Quipa huiñaicuna canta yuyarichunmi, cai shimicunataca canman rimani. Shuctac llactapi causaccunapish canta yuyarishpami, huiñai huiñaita alli ningacuna.