SALMOS 44 - Dios Rimashcata Quillcashcami

Cunanpish ñaupa shina quishpichichun mañashcamanta

Cantaccunata pushac cantachichun, yachachingapac Corepac churicuna ruhuashca Salmomi.

¹ Ñuca Dioslla, ñaupa huatacunapi, ñucanchic taitacuna causai punzhacunapi cai tucui allicunata ruhuashcataca ñucanchic ringrihuantacmi uyashcanchic. Chaitaca ñucanchic taitacunami parlarca.

² Canca ñucanchic taitacuna chai llactapi allita causachunmi cambac maquihuan chai llactapi causaccunataca llaquichishpa llucchishpa cacharcangui.

³ Chai llactataca mana paicunapac espadahuan, mana paicunapac rigrahuan macanacushpachu japirca. Ashtahuanpish can cuyashcamantami paicunapac ñaupaman achiclla shamushpa, cambac poderhuanmi mishachircangui.

⁴ Ñuca Dioslla, canca ñuca Jatun Mandacmi cangui. Jacobopac huahuacunata quishpichiyari.

⁵ Can ayudacpimi, ñucanchicta piñaccunataca mishashun. Cambac shutipimi ñucanchicta piñaccunataca sarushun.

⁶ Ñuca arcoca imapac mana valingachu. Ñuca espadapish mana quishpichingachu.

⁷ Canmi ñucanchicta piñaccunamanta cacharichircangui. Ñucanchicta mana ricunayachiccunatapish canmi pingaichircangui.

⁸ Can Dios-huanmi tucui causaipi cushicushun, cambac shutitaca huiñaitami alabashun.

⁹ Ashtahuanpish ñucanchicllata saquishpami llaquichishcangui. Chaimantami ñucanchic soldadocunahuanca ña mana llucshingui.

¹⁰ Ñucanchictaca piñaccunapac ñaupamanta manchashpa, callpachunmi saquishcangui. Ñucanchicta mana ricunayachiccunapish, tucui charishcacunatami apancuna.

¹¹ Ovejata shinami huañuchicpac maquipi churangui. Shuctac llactacunamanmi caita chaita cachangui.

¹² Can acllashcacunataca ashalla cullquipipish, mana caturcanguichu. Paicunamantaca imatapish mana japishcanguichu.

¹³ Ñucanchic ladollapi causaccuna camishpa rimachun, ñucanchic muyundipi causaccuna burlachunmi churangui.

¹⁴ Shuctac llactacunapi causaccuna burlachunmi, chai llacta chaupipi saquingui. Ñucanchicta ricuccunaca umata cuyuchishpami asincuna.

¹⁵ Punzhantami llaquihuanca huañucuni. Ñucaca pingaipimi pucayacuni.

¹⁶ Ñucata piñaccuna tucuchina munaihuan caparishpa, mapa shimicunahuan camishpa llaquichicpimi llaquihuan purini.

¹⁷ Cai tucui llaquicunami shamushca shina cacpipish cantaca mana cungarishcanchicchu. Ñucanchicca canhuan ari nishcata mana cungarishpami causanchic.

¹⁸ Ñuca shungupish canmantaca mana anchurishcachu. Cambac ñanmantapish mana anchurishpami causacunchic.

¹⁹ Shina cacpipish, chacal animalcuna sirinapimi shitarcangui. Manchana llanduhuanmi ñucanchictaca taparcangui.

²⁰ Ñucanchic Diospac shutita cungacpi, mana cashpaca yanga dioscunata mañashpa maquita chutacpica,

²¹ ñucanchic shungu yuyashcatapish yachac Diosca ¿manachu llaquichinman carca?

²² Ashtahuanpish cambac cashcamantami punzhanta huañuchishun nishca causanchic. Huañuchina ovejacunata shinami charincuna.

²³ Jatun Dioslla, ¿ima nishpatac sueñunguiyari? Ama shitashpa saquichu ricchariyari.

²⁴ ¿Ima nishpatac cambac ñahuita pacanguiyari? ¿Ima nishpatac huatashca shina llaquita causacucta ricushpapish ñucanchictaca cungaringuiyari?

²⁵ Ñucanchic almaca pingaichishpa pambacaman cumurichishcami. Ñucanchic cuerpotaca allpatami aisashcangui.

²⁶ Can llaquic cashcamanta ñucanchicta ayudangapac jatarishpa quishpichiyari.