SALMOS 42 - Dios Rimashcata Quillcashcami

ISHCAINIQUI PARTE (Salmos 42—72 ) Yacunayaihuan shina Diosta mashcashcamanta

Cantaccunata pushac cantachichun, yachachingapac Corepac churicuna ruhuashca Salmomi.

¹ Ñuca Dioslla, taruga yacuta huacashpa mashcac shinami ñuca almapish cantaca mashcacun.

² Ñuca almaca yacunayaihuan huañucuc shinami, causac Diosta mashcan. ¿Ima horastac Diospac ñaupapi ricuringapac rishayari?

³ Tutapish, punzhapish huacashpami huiquillata micucuni. Punzhantami ñucataca: «¿Maipitac cambac Diosca?» nishpa llaquichincuna.

⁴ Achcacunata pushashpami Diospac huasimanca ric carcani. Fiestacunapipish achcacunahuanmi cushi tonohuan cantashpa chayac carcani. Tucui chaicunata yuyarishpami, tucui almahuan yallita llaquirini.

⁵ Ñuca almalla, ¿ima nishpatac shaicushpa, ñuca ucupi llaquiricunguiyari? Diosta alabanaracmi cani. Paita shuyailla. ¡Paica ñuca Diosmi, ñuca quishpichicmi!

⁶ Ñuca Dioslla, ñuca almaca llaquihuan shaicushcami. Chaimantami canta yuyarini. Jordán yacu cuchu llactamanta, Hermón urcumanta, Mizar urcumantami canta yuyaricuni.

⁷ Yacuca urcucuna catichictami huaj nishpami shamucun. Can cachashca yacucuna jatarishpami ñuca jahuata pasacun.

⁸ Punzhapica Mandac Diosmi llaquic cashcata ricuchinga. Tutaca ñucami paita alli nisha. Ñucaman causaita cuc Diostaca mañacunillami.

⁹ Ñuca Diostaca: «Ñuca miticuna jatun rumimi cangui. ¿Imamantatac ñucata cungaringuiyari? ¿Imamantatac piñaccuna llaquichicpi, duelo churanahuan puricushayari?» ninimi.

¹⁰ Ñucata piñaccunaca punzhantami: «¿Maipitac cambac Diosca?» nishpa tapuncuna. Chashna rimashpami, ñuca tullucunataca ñutuchic shina llaquichincuna.

¹¹ Ñuca almalla, ¿ima nishpatac shaicushpa, ñuca ucupi llaquiricunguiyari? Diosta alabanaracmi cani. Chaimanta paita shuyailla. ¡Paica ñuca Diosmi ñuca quishpichicmi!