SALMOS 41 - Dios Rimashcata Quillcashcami

Ungushca cashpa Diosta mañanamanta

Cantaccunata pushac cantachichun, David ruhuashca Salmomi.

¹ ¡Huaccha runata llaquicca cushicunmi! Llaqui punzhacunapica, Mandac Diosmi quishpichinga.

² Mandac Diosca huacaichingami, causaitapish cungami. Allpa pachapica alli nishcami canga, millai gentecuna paicuna munashcata ruhuachunpish mana saquingachu.

³ Camapi nanaihuan cacpipish Mandac Diosmi cuidanga. Ungushca siricucpipish camataca ñutunllatami ruhuanga.

⁴ Ñucaca: «Mandac Dioslla, canta llaquichishpami juchata ruhuashcani. Ñucata llaquishpa, ñuca almata allichiyari» nircani.

⁵ Ñucata piñaccunaca: «Cai runaca, ¿ima horastac huañushpa, chingaringayari?» nincunami.

⁶ Ñucata ricungapac shamushpaca llullanacuncunami. Paicunapac shungupica paicunallatacmi yalli millaita jundachicun. Canzhaman llucshishpaca ñuca ima shina cashcatami parlancuna.

⁷ Tucui ñucata piñaccunaca tandanacushpami rimarincuna. Ñucamanta millaita yuyashpami:

⁸ «Mana cuchuyaipac millai ungüimi japishca. Cai ungüi maijanta japicpica, mana jataringachu» nincunami.

⁹ Ñucahuan alli apanacuc, ñucahuan micuc, ñuca shunguta churashca runallatacmi ñucapac contra jatarirca.

¹⁰ Shina cacpipish, Mandac Dioslla, ñucata llaquiyari. Paicuna ruhuashca shinallatac cutichingapac jatarichiyari.

¹¹ Ñucata piñaccuna cushicuchunca amatac saquinguichu. Chashna ruhuacpimi, ñuca canhuan alli causacushcata yachasha.

¹² Ñucataca tucui pandarinamantami huacaichishcangui. Tucui causaipimi cambac ñaupapi charirashcangui.

¹³ ¡Israelcunata Mandac Diosca huiñai huiñaita alli nishca cachun! Chashna cachun, chashna cachun.