SALMOS 40 - Dios Rimashcata Quillcashcami

Llaquimanta llucchicpi, Diosta alabashcamanta

Cantaccunata pushac catachichun, David ruhuashca Salmomi.

¹ Mandac Dios ayudangacamanmi shuyacurcanilla. Jahua pachamanta cumurishpami ñuca caparishpa mañashcata uyarca.

² Paimi ñucataca llaquihuan jutcupi huañucucta llucchirca. Ñucata aguachicuc guzumantami llucchirca. Chaimanta llucchishpaca ñuca chaquicuna sinchita purichunmi jatun rumi jahuapi churarca.

³ Ñuca shimipica mushuc cantotami churarcangui. Chai cantohuanmi ñuca Diosta alli nini. Chaita ricushpaca achcacunami mancharishpa, paicunapac shungutaca Mandac Diospi churanga.

⁴ Jatun tucushcacunatapish, ruhuashcalla dioscunahuan llullashpa, pandachiccunatapish mana catishpa, Mandac Diospi shunguta churacca cushicunmi.

⁵ Mandac Dioslla, ñuca Dioslla, jatun mancharinacunataca achcatami ruhuashcangui. Ñucanchicman allita ruhuana yuyaillami cangui. Can ruhuashca allicunaca mana yupaipacmi. Can tucui allicunata ruhuashcata cambac ñaupapi yupashpa huillasha nishpapish maita mana yupaipacmi can.

⁶ Animalcunata canman cushpa huañuchichunpish, ofrendata cuchunpish mana munanguichu. Juchacunamanta animalcunata cushpa, tucui rupachichunpish mana mañashcanguichu.

⁷ Chaimantami ñucaca: «Can quillcashca pillushca carapica ñucamantami huillacun. Ñucaca chaita ruhuangapacmi shamuni. Chai carapica:

⁸ “Ñuca Dioslla, cambac munaita ruhuashpami cushicuni. Can mandashcataca ñuca shungupimi huacaichini” ninmi» nircani.

⁹ Cashcata can ruhuac cashcataca jatun tandanacuipimi huillarcani. Mandac Dioslla, ñuca mana upalla saquirishcataca canllatacmi yachangui.

¹⁰ Cashcata can ruhuashcatapish, allita ruhuac cashcatapish, can llaquic cashcatapish, mana llullac cashcatapish mana pacashpami, jatun tandanacuipi huillarcani.

¹¹ Mandac Dioslla, ñucata llaquinataca amatac saquichu. Can llaquic cashcahuan, mana llullac cashcahuan, huiñaita huacaichiyari.

¹² Ñucataca mana yupaipac llaquicunami chaupinchishca. Millaita ruhuashcamantami cashna llaqui tucuni. Huichai ricunallatapish mana pudinichu. Llaquicunaca ñuca uma acchatapish yalli achcamari. Ñuca shungupish ña huañucunmi.

¹³ ¡Mandac Dioslla, quishpichingapac utca shamuiyari! ¡Mandac Dioslla, ñucata ayudangapac utcamuiyari!

¹⁴ Ñucata ima shinapish huañuchishun nishpa puriccunaca pingaichishca, mana valichishca cachun.

¹⁵ Ñucata huañuchisha niccunaca huashaiman cutishpa muspachishca cachun. Ñucata burlashpa asiccunaca pingaichishpa tucuchishca cachun.

¹⁶ Canta mashcaccunaca tucui mashna yallita cushicuchun. Can quishpichichun munaccunaca: «¡Mandac Diosca jatunmi!» ninataca amatac saquichun.

¹⁷ Ñuca ima illaclla huaccha cacpipish, Mandac Diosca yuyaringami. Mandac Dioslla, ñucata ayudac, ñucata quishpichicmi cangui. ¡Mandac Dioslla, ama unayaichu!