SALMOS 4 - Dios Rimashcata Quillcashcami

Chishicuna Diosta mañanamanta

Cantaccunata pushac cuerdayuc tocanacunahuan cantachichun David ruhuashca Salmomi.

¹ ¡Cashcata ruhuac Dioslla, ñuca caparishpa mañashcata uyaiyari! Canmi ñuca llaquihuan cacpica, cushichircangui. Ñucata llaquishpa, ñuca mañashcata uyaiyari.

² Huañuclla runacunalla, ¿ima horascamantac imapish yanga llulla dioscunata mashcashpa, ñucata yangapi churanguichiclla? ¿Maicamantac yanga causaillata, llullanallata mashcanguichic?

³ Mandac Dios paita yuyaricta paipaclla cachun acllashcataca yachaichicyari. Ñuca paita caparishpa mañacpica uyangallami.

⁴ Paipac ñaupapi chucchuichicyari, ama ashtahuan juchallichicchu. Camapi siririshpa shungupi upalla tucushpa yuyarichicyari.

⁵ Cashcata ruhuashpami, animalcunata Diosman cushpa huañuchina canguichic. Diospi shunguta churaichicyari.

⁶ Taucacuna rimashpaca: «¿Pitac allita ruhuashpa ricuchingayari?» nincunami. Mandac Dioslla, cambac ñahuihuan ñucanchicta achicyachiyari.

⁷ Canca paicuna achca granota, vinota japishpa cushicushcamanta yallimi ñucataca shungupi cushichingui.

⁸ Can Mandac Diosmi ñucataca imatapish mana manchashpa causachun ruhuashcangui. Chaimantami cushilla siririshpa sueñusha.