SALMOS 39 - Dios Rimashcata Quillcashcami

Runapac causai utca tucurinamanta

Cantaccunata pushac Jedutún pushashpa cantachun, David ruhuashca Salmomi.

¹ Ñucaca: «Ñuca calluhuan mana juchallingapacmi alli yuyaihuan causasha. Diosta mana cazuccunapac ñaupapica shimipi frenota churac shinami millaita rimanamanta jarcarisha» nircani.

² Shinami mana rimashpa upalla saquirircani. Ima allicunatapish mana rimarcanichu. Shina cacpipish ñuca ungüica ashtahuanmi anchayarca.

³ Ñuca shunguca rupashpami rauracurca. Ñuca shungumanta samaita aisacpica, nina japiric shinami llucshirca. Chaimantami ñuca calluhuanca:

⁴ «Mandac Dioslla, ñuca causai tucurinata huillaiyari. Maicaman causana cashcatami yachasha nini. Ñuca huañuna cacpipish ricuchiyari.

⁵ Riqui, ñuca causana punzhacunatapish ashallatami cushcangui. Ñuca causaica cambac ñaupapica yangallami. Tucui runacunapac causaica samai chingaric shinami tucurinlla.

⁶ Runaca shuc llandu shinallami. Yangami imatapish charinata munan. Pai charishcacunata pi japina cashcatacami mana yachanchu.

⁷ Jatun Dioslla, cunanca ¿imatatac shuyashayari? Ñuca shuyanaca canllami cangui.

⁸ Ñucataca canta mana cazuccunamanta huacaichiyari. Chai mana entendic runa asichunca ama saquinguichu.

⁹ Canllatac ñucata llaquichishcamantami mana rimashpa upalla saquirini.

¹⁰ Can churashca ungüitaca ñucamanta anchuchiyari. Cambac maquihuan llaquichicucpimi ñucaca tucuricuni.

¹¹ Runataca llaquichishpami juchamantaca jarcangui. Pai sumac cashcataca polilla shinami tucuchingui. Tucui runacunapac causaica samai chingaric shinami tucurinlla.

¹² Mandac Dioslla, ñuca mañashcata uyaiyari. Ñuca caparicushcata uyaiyari. Ñuca huacacucta ricushca jahuaca ama upalla saquirichu. Cambac ñaupapica puric shinallami cani. Ñuca ñaupa taitacuna shina shamushcallami cani.

¹³ Ama ashtahuan ñucata piñarishpa chapaichu. Ñucaca cushicuitami japisha. Causaitaca amarac quichuichu» nircani.