SALMOS 38 - Dios Rimashcata Quillcashcami

Llaquihuan cashpa mañashcamanta

Diosta yuyarichun, David cantashca Salmomi.

¹ Mandac Dioslla, ama yallita piñarishpa rimashpa nanachichu. Nina japiric shina piñarishpa ama llaquichichu.

² Chaica cambac flechacunaca ñucapimi urmarca. Cambac maquipish ñuca jahuapimi ñiticun.

³ Can nina japiric shina piñarishcamantami ñuca cuerpoca tucui ungushca can. Ñuca juchamantami ñuca tullucunapish ungushca can.

⁴ Ñuca millaita ruhuashcami ñucataca ñiticun. Jatun quipi shinami ñuca jahuapi llashacun.

⁵ Yuyai illac shina ima mana allita ruhuashcamantami ñuca cuerpoca sisushpa ashnacun.

⁶ Ñucaca yallita llaquirishpami aruyashpa puricuni. Yana churanata churarishca shinami punzhanta puricuni.

⁷ Ñuca lomoca ruparicunmi. Ñuca cuerpoca shuc partepish mana allichu.

⁸ Ñucaca yallita irquiyashca tucui aicha polvoshca, shungu nanaihuanmi caparicuni.

⁹ Jatun Dioslla, ñuca tucui ima munashcataca yachanguimi. Ñuca shungu llaquiricushcaca mana pacallachu can.

¹⁰ Ñuca shunguca llaquihuan saltacunmi. Fuerzatapish ña mana charinichu. Ñuca ñahuipish amsayanmi.

¹¹ Ñuca ricsishcacunapish, ñucahuan puriccunapish, ñuca familiacunapish ñuca sisuta ricushpaca caruyancunami.

¹² Ñucata huañuchishun niccunaca ima shina urmachinatami yuyaricuncuna. Ñucata llaquichinata yuyacuccunaca millaitami parlanacuncuna. Ñucata urmachingapacmi tucui punzha yuyarinacuncuna.

¹³ Ashtahuanpish mana uyac shinami tucuni. Mana shimi llucshic shinami upalla saquirini.

¹⁴ Manatac uyac runa shinami cani. Shimihuanpish imata mana rimashpami upalla saquirini.

¹⁵ Mandac Dioslla, canllatami shuyacuni. Mandac Dioslla, canmi ñuca mañashcata cutichingui.

¹⁶ Ñucaca: «Ama ñucamanta cushicuchuncuna. Ñuca urmacta ricushpa ama jatun tucuchuncuna» nircanimi.

¹⁷ Ashtahuanpish ña huañunallami cani. Ñuca cuerpoca nanacunllami.

¹⁸ Chaimantami cunanca ñuca juchacunata canman huillasha. Mana allita ruhuashcamantaca yallitami llaquirisha.

¹⁹ Ñucata piñaccunaca sinchirac causacunracmi. Ñucata yanga mana ricunayachiccunaca ashtahuanmi mirashca.

²⁰ Allita ruhuacpi, mana allitami ruhuancuna. Ñuca allita ruhuacpica, piñashpami camincuna.

²¹ Mandac Dioslla, ama ñucallata saquichu. Ñuca Dioslla, ama ñucamanta caruyaichu.

²² Ñucata quishpichic Jatun Dioslla, utca ayudaiyari.