SALMOS 37 - Dios Rimashcata Quillcashcami

Millaicunapac ñanta mana catinamanta

David cantashca Salmomi.

¹ Millaita ruhuaccunamantaca ama yallita piñarichu. Paicuna imata ruhuashcata ricushpa ama canpish ruhuasha nichu.

² Paicunaca quihua shinami pitishca canga. Llullu quihua shinami chaquinga.

³ Mandac Diospi shunguta churashpa allita ruhuailla. Cambac llactapi allita ruhuashpa causailla.

⁴ Mandac Dios-huan cushicuilla. Paica cambac shungu munashcata cungallami.

⁵ Cambac causaitaca Mandac Diospac maquipi churailla. Paipi shunguta churacpica, imata cashpapish ruhuangami.

⁶ Achicllapi shinami canmanca cashcata ruhuanga. Chaupi punzhapi shinami can japinataca cunga. Cambac cashcata ruhuanaca achicyamucuc shinami ricuringa.

⁷ Mandac Diospac ñaupapi upalla cailla. Pai imatapish nichun shuyailla. Millaicuna sumacta causacta ricushpapish, ama chai causaita munanguichu.

⁸ Yallita piñarinata cungaringui. Chai piñarina yuyaita saquingui. Mana allita ruhuanataca amatac munanguichu.

⁹ Chaica millaicunaca chingachishcami canga. Mandac Diosta shuyaccunaca quiquin allpatami japingacuna.

¹⁰ Asha punzha quipaca millaita ruhuacca chingaringami. Pai tiyacushca pushtupi ricugrishpapish mana taringuichu.

¹¹ Ashtahuanpish mana piñaric shunguta chariccunami allpataca japingacuna. Sumac causaihuanmi yallita cushicungacuna.

¹² Diosta mana manchac runaca cashcata ruhuac runataca quirucuna canirishpami piñan.

¹³ Mandac Diosca chai runata llaquichina punzha chayamucucta yachashpaca asingami.

¹⁴ Diosta mana manchac runacunaca imata mana chariccunata, huacchacunata urmachingapacmi espadacunata llucchincuna, arcocunatapish chutancuna. Imatapish allita ruhuaccunata huañuchingapacmi charincuna.

¹⁵ Shina cacpipish, paicunapac espadaca paicunapac shungullapitacmi yaicunga. Cutin arcoca paquiringami.

¹⁶ Juchata ruhuaccuna achcata charicpipish cashcata ruhuaccuna ashallata charinami ashtahuan alli.

¹⁷ Diosta mana manchaccunapac rigraca paquishcami canga. Ashtahuanpish cashcata ruhuaccunata sinchiyachicca Mandac Diosmi.

¹⁸ Mandac Diosca punzhantami allita ruhuaccunapac causaitaca ricucun. Paicuna japina cashcaca huiñaipacmi canga.

¹⁹ Mana alli punzhacunapica mana pingaichishcachu canga. Yarcai punzhacunapipish mana nictami micungacuna.

²⁰ Ashtahuanpish Diosta mana manchaccunaca chingachishcami canga. Mandac Diosta piñaccunaca cari oveja huira shinami yacuyanga. Cushni shinami chingaringa.

²¹ Diosta mana manchac runaca imata mañashpapish mana cutichinchu. Ashtahuanpish cashcata ruhuac runaca llaquishpami cutichin.

²² Pai bendiciashca runacunami llactataca japinga. Shinallatac pai maldiciashca runacunaca tucuchishcami canga.

²³ Mandac Diosmi runa ima shina causanataca ricuchicun. Allita ruhuac runataca alli ningami.

²⁴ Runa urmashpapish mana chaipi saquiringachu. Paitaca Mandac Diosmi maquimanta charicun.

²⁵ Ñucaca huambrami carcani. Cunanca ñami yuyacyashcani. Cashcata ruhuac runa shitashca causacuctaca mana ricushcanichu. Paipac churicuna micunata mañashpa puricuctapish mana ricushcanichu.

²⁶ Paica ima punzhapish llaquishpa mañachinllami. Paipac huahua huahuacunapish bendiciashcami canga.

²⁷ Mana allimanta anchurishpa allita ruhuai. Chashna ruhuashpami huiñaita causangui.

²⁸ Mandac Diosca imatapish allita ruhuactaca cuyanmi. Paita caticcunataca mana shitashpa saquingachu. Tucui causaipimi huacaichinga. Ashtahuanpish paita mana manchaccunapac huahuacunataca tucuchingami.

²⁹ Cashcata ruhuaccunami llactataca japinga. Huiñaitami chai llactapica causangacuna.

³⁰ Cashcata ruhuac runaca alli yachashca rimaicunatami riman. Paipac calluca imapish cashcallatatacmi riman.

³¹ Paipac shungupica paipac Dios mandashcata yuyashpallami causan. Chaimantami paipac chaquica mana lluchcaringa.

³² Diosta mana manchac runaca cashcata ruhuac runata huañuchingapacmi pacalla chapacun.

³³ Mandac Diosca mana chai runapac maquipica saquingachu. Juezcuna juchanchishpa yallita llaquichichunpish mana saquingachu.

³⁴ Mandac Diosta shuyashpa pai mandashcata cazui. Paimi llactata cungapac jatunyachishpa charinga. Juchata ruhuac runacunata tucuchishca quipami chaitaca ricungui.

³⁵ Diosta mana manchac runataca yallita jatun tucuctami ricurcani. Libanopi tiyac cedro yura shina jatunyactami ricurcani.

³⁶ Shina cashpapish, paica chingarishpa ña mana ricurircachu. Paita mashcashpapish mana tarircanichu.

³⁷ Ima mana allita ruhuac runataca yuyariyari. Cashcata ruhuac runataca ricuiyari. Sumacta cushilla causac runaca quipatami cushicunga.

³⁸ Ashtahuanpish mana cazuccunaca tucuita tandachishpa tucuchishcami canga. Diosta mana manchaccunapac huahua huahuacunaca tucuringami.

³⁹ Cashcata ruhuaccunataca Mandac Diosmi quishpichinga. Paica llaqui punzhacunapi jarcarina jatun pirca shinami.

⁴⁰ Mandac Diosmi ayudashpa cacharichinga. Paita mana manchaccunapac maquimanta llucchishpami quishpichinga. Chaica, paita shuyacushcamantami chashnaca quishpichinga.