SALMOS 36 - Dios Rimashcata Quillcashcami

Mandac Dios llaquic cashcamanta

Cantaccunata pushac cantachichun Mandac Diosta servic David cantashca Salmomi.

¹ Diosta mana manchac runamanca millai yuyaimi paipac shungupi rimacun. Paica Diosta manchanataca mana yuyarinchu.

² Chaimantami pai chashna mana allita ruhuashpaca alli cashcata yuyan. Paipac juchataca mana millanayachinchu.

³ Paipac shimihuanca llullallata, millaillatami riman. Alli yuyarinatapish, alli ruhuanatapish saquishcami.

⁴ Paica camapi siricushpapish, millaita ruhuanallatami yuyarin. Millai ñanpi cashpami millaita ruhuanataca mana millanayachin.

⁵ Mandac Dioslla, cambac llaquinaca jahua pachacamanmi. Can tucuita pactachic cashcapish jahua puyucamanmi.

⁶ Cashcata can ruhuashcapish cambaclla jatun urcucuna shinami. Can mandashcacunaca jatun mama cucha yacu shinami. Mandac Dioslla, gentecunatapish animalcunatapish cambac maquipi charingui.

⁷ ¡Mandac Dioslla, cambac cuyaica mai sumacmari! Chaimantami huañuclla aichayuc runacunaca cambac alas ucupi miticuncuna.

⁸ Cambac huasi ucupi tiyac micunatami huicsa pactata micungacuna. Cambac sumaccunataca yacuta ubiachic shinami cungui.

⁹ Canllami causaita cuc yacutaca charingui. Can achicyachicpimi achicta ricui pudinchic.

¹⁰ Canta ricsiccunaman cuyaita ricuchiyari. Alli shungucunaman cashcata ruhuaiyari.

¹¹ Jatun tucushcacuna ñucata saruchun ama saquinguichu. Canta mana manchaccuna paicuna munashcata ruhuachun ama saquinguichu.

¹² ¡Chaipimi chai millai runacunaca urmashpa jaicapi mana jataringacuna!