SALMOS 35 - Dios Rimashcata Quillcashcami

Piñaccunapac maquimanta quishpichichun mañashcamanta

David cantashca Salmomi.

¹ Mandac Dioslla, ñucata piñaccunahuan shayariyari. Ñucahuan macanacuccunahuan macanacuiyari.

² Jatun escudotapish, uchilla escudotapish japishpa, ñucata ayudangapac shamuiyari.

³ Ñucata llaquichingapac caticcunata lanzata japishpa ñanpi tupaiyari. Ñuca almataca: «Ñucami canta quishpichic cani» niyari.

⁴ Ñucata huañuchisha niccunaca burlashpa pingaichishca cachun. Ñucata llaquichingapac yuyarinacuccunaca pingaichishpa huashaiman callpachishca cachun.

⁵ Tamota huaira apashca shina callpachun. Mandac Diospac ángel catishca cachun.

⁶ Paicunapac ñanca amsayashca lluchcarinalla cachun. Mandac Diospac ángel paicunata cati rishpa llaquichichun.

⁷ Manapish ima millaita ruhuacpimi, ñuca urmachun jutcutapish, linchitapish ruhuashpa churarcacuna. Manapish ima millaita ruhuacpimi, ñuca urmachun tucllata ruhuarcacuna.

⁸ Paicunata cungaimanta llaqui japishca cachun. Pacalla churashca tucllallapitac paicunallatac urmashpa, jatun llaqui tucuchun. Jatun llaqui tucushpa chingachishca cachun.

⁹ Chashna cacpimi, ñucaca Mandac Dios-huan cushicusha. Pai quishpichishcamantami ñucaca yallita cushicusha.

¹⁰ Chaimantami ñuca tullucuna cushicushpaca: «Mandac Dioslla, ¿Pitac can shina tiyanyari? Canmi llaquilla runataca paita yalli sinchi runacunapac maquimanta cacharichingui. Imata mana charictapish, huaccha runatapish llaquichic runapac maquimantami quishpichingui» ningacuna.

¹¹ Ñuca manapish yachashcata tapungapacmi llullashpa juchanchic runacuna jatarincuna.

¹² Allita ruhuashcamantaca mana allitami ñucamanca ruhuancuna. ¡Ñuca almaca yallitami llaquirin!

¹³ Paicuna ungushpa llaquilla cacpica, sharpa churanata churarishpami llaquilla purircani. Yallita llaquirishpami ayunashpa ñuca shungupica mañacurcani.

¹⁴ Ñuca ricsishcamanta shina, ñuca huauquimanta shinami llaquirircani. Quiquin mama huañucpi shinami, duelo churanata churarishpa llaquirircani.

¹⁵ Ashtahuanpish ñuca llaquihuan cacpica, tandanacushpami asircacuna. Ñuca mana yachacpimi, ñucata piñaccunaca ñucata llaquichingapac tandanacurca. Paicunaca mana saquishpami, yallita llaquichicurca.

¹⁶ Burlashpami yallita llaquichirca. Ñucata piñashpami quirucuna caniricurca.

¹⁷ Jatun Dioslla, ¿Maicamantac chashna ruhuacta ricucunguilla? Ñucataca huañunamanta quishpichiyari. Ñuca causaitaca leoncunapac shimimanta huacaichiyari.

¹⁸ Can ruhuashcataca achca tandanacushca gentecunamanmi huillasha. Achca gentecunapac ñaupapimi alabasha.

¹⁹ Ñucahuan yanga piñariccunaca amatac cushicuchuncuna. Yanga mana ricunayachiccunapish ama ñahuita quimllachun.

²⁰ Cushi causaimantaca mana parlanacuncunachu. Ashtahuanpish cai llactapi causac alli shungucunatami llaquichingapac llullancuna.

²¹ Ñucata yallita shimita pascashpa rimashpaca: «¡Aja, ñucanchic ñahuihuantacmi ricunchic!» nincuna.

²² Mandac Dioslla, canllatacmi ricucungui. Ama upalla saquirichu. Jatun Dioslla, ama ñucamanta caruyaichu.

²³ Ñuca Dioslla, ñucata Mandaclla, cashcata ruhuashpa ñucata misangapac riccharishpa shayariyari.

²⁴ Ñuca Mandac Dioslla, can mana pandaric cashca shinallatac cashcata ruhuashpa, ñucata burlashpa asichunca ama saquichu.

²⁵ Paicunapac shungupipish: «¡Aij, ñucanchicca chashna cachunmi munarcanchic!» nishpa: «Paitaca tucuchishcanchictacmi» nichunca ama saquichu.

²⁶ Ñuca llaquihuan cacpi, cushicuccunaca pingaichishca, muspachishca cachun. Ñucata piñashpa jatun tucuccunaca pinganayaipac churanata churarishca shina musparichun.

²⁷ Ashtahuanpish manapish faltayuc ñucata misaccunaca cushicushpa cantachun. Punzhanta paicunaca: «¡Mandac Diosca jatunmari, paita servictaca sumacta causachunmi munan!» nichunlla.

²⁸ Ñuca shimihuanca cashcata can ruhuashcatami huillasha. Punzhantami canta alli nicushalla.